Утверждена новая редакция акафиста преподобному Герману Аляскинскому

Утвержденные богослужебные тексты будут направлены в Издательство Московской Патриархии для включения в богослужебные сборники.

Также в ходе заседания был заслушан рапорт председателя Издательского Совета Русской Православной Церкви митрополита Калужского и Боровского Климента о новой редакции текста акафиста преподобному Герману Аляскинскому (журнал № 62).

Синод постановил одобрить для употребления за богослужением и в домашней молитве предложенный текст акафиста и направить его в Издательство Московской Патриархии для включения в богослужебные сборники.

Патриархия.ru

Акафист преподобному Герману Аляскинскому

Кондак 1

Избрáнный чудотвóрче и преслáвный угóдниче Христóв, богонóсне óтче наш Гéрмане, Аля́ски украшéние и Цéркве Правослáвныя рáдование, воспевáем ти похвалы́ сия́. Ты же, я́ко Небéсный наш покрови́тель и всемóщный пред Бóгом моли́твенник, не престáй ходáтайствовати о нас, чáдех твои́х, усéрдно тебé вопию́щих: Рáдуйся, преподóбне óтче наш Гéрмане, преслáвный чудотвóрче.

Икос 1

Áнгелов Творéц предызбрá тя, óтче Гéрмане, проповéдником бы́ти правослáвныя вéры в зéмлех нóвых и послá тя, я́ко благовéстника, ко язы́чником, да возсия́ет им свет И́стины. Благодáрнии же лю́дие воспевáют тебé, я́ко Небéсному покрови́телю, похвалы́ сия́:

Рáдуйся, пусты́нею Сарóвскою издéтска взращéнный;

рáдуйся, Валаáмския оби́тели óтрасле пречестнáя.

Рáдуйся, пусты́нное уединéние возлюби́вый;

рáдуйся, Бóжиею Мáтерию от смéрти спасéнный.

Рáдуйся, апóстолов послéдователю;

рáдуйся, свет и́стинныя вéры во Амéрику принесы́й.

Рáдуйся, Фавóрским свéтом озарéнный;

рáдуйся, тьму идолослужéния Христóм просвети́вый.

Рáдуйся, преподóбне óтче наш Гéрмане, преслáвный чудотвóрче.

Кондак 2

Ви́дя Госпóдь плáменную любóвь твою́, éюже от ю́ности возгорéся, преподóбне, во оби́тель Сарóвскую Емý еди́ному послужи́ти приведé тя, последи́ же на óстров Валаáмский путь твой упрáви, идéже в сóнме и́ноков ты воспевáл еси́ неустáнно: Аллилýиа.

Икос 2

Рáзум духóвный тебé от ю́ности даровáся, свя́тче Бóжий, да уразумéеши красотý небéсную и слáдость ея. Сегó рáди от премýдраго игýмена Назáрия, настáвника преподóбнаго Серафи́ма Сарóвскаго, поучáлся еси́ премýдрости Бóжией и путéм Госпóдним, тéмже Святáя Цéрковь восхваля́ет тя:

Рáдуйся, в дéбрех сарóвских стáрцу пусты́ннику послужи́вый;

рáдуйся, с преподóбным Серафи́мом еди́наго настáвника имéвый.

Рáдуйся, я́ко пчелá, от вели́каго Феóдора духóвный нектáр в Санаксáре собрáвый;

рáдуйся, во преслáвную оби́тель Валаáмскую на пóдвиги пришéдый.

Рáдуйся, я́ко тезоимени́тому тебé Гéрману, первоначáльнику Валаáмскому, свя́тостию уподóбился еси́;

рáдуйся, я́ко пóдвиги пустынножи́тельския подъя́л еси́.

Рáдуйся, за крóтость и ти́хость брáтиею валаáмскою почитáемый;

рáдуйся, ны́не всéю Цéрковию прославля́емый.

Рáдуйся, преподóбне óтче наш Гéрмане, преслáвный чудотвóрче.

Кондак 3

Си́ла Вы́шняго повелé богомýдрому Петрóва грáда святи́телю Гаврии́лу послáти проповéдники правослáвныя вéры в зéмлю Аля́скинскую и тебé, преподóбне Гéрмане, сей жрéбий апóстольский прия́ти. Тéмже вси лю́дие, просвещéннии свéтом Христóвым труды́ твои́ми и óбразом жития́ твоегó, воспéша Бóгу: Аллилýиа.

Икос 3

Имéя не тóкмо тщáние о пóдвизе и́ночестем, но и рéвность апóстольскую в проповéдании, ты, преподóбне Гéрмане, лю́дем, во тьме язы́ческаго невéдения седя́щим, Христá распя́таго и воскрéсшаго возвести́л еси́. Поминáюще ýбо и́ноческая бдéния твоя́ и труды́ апóстольския, с любóвию восхваля́ем тя:

Рáдуйся, безрóпотное послушáние игýмену яви́вый;

рáдуйся, в путь дáльний прóповеди рáди евáнгельския отшéдый.

Рáдуйся, любвé ко отéчеству не угаси́вый;

рáдуйся, нóвое твоé отéчество плáменне возлюби́вый.

Рáдуйся, и́ноческаго жития́ во Амéрице первоначáльниче;

рáдуйся, правослáвныя вéры рéвностный проповéдниче.

Рáдуйся, óбразе преподóбных оби́тели Лáдожския;

рáдуйся, Сéверныя Фиваи́ды óтрасле, во Аля́ске процветы́й.

Рáдуйся, преподóбне óтче наш Гéрмане, преслáвный чудотвóрче.

Кондак 4

Бýрю злых напáстей и скорбéй претерпéл еси́, преподóбне, и пóдвигом дóбрым во странé нóвей подвизáлся еси́, сегó рáди и Христóс тя прослáви и дáром прозрéния и чудéс обогати́ и даровá тебé Цáрство Небéсное, идéже ты со Áнгелы воспевáеши Бóгу: Аллилýиа.

Икос 4

Слы́шаще о чудесéх твои́х, лю́дем явлéнных, егдá óгненное запалéние и наводнéние губи́тельное ты останови́л еси́ моли́твою своéю, вси лю́дие умиля́хуся сéрдцем. Мóлим тя и нам яви́ти си́лу твою́ и пóмощь, к тебé вопию́щим:

Рáдуйся, богопропровéдниче, рéвностию твоéю нас вдохновля́яй;

рáдуйся, боголю́бче, сердцá нáша рáдостию исполня́яй.

Рáдуйся, за всех унывáющих тéплый моли́твенниче;

рáдуйся, душ смятéнных преслáдостный умири́телю.

Рáдуйся, я́ко смирéнием твои́м подаéши стрáждущим исцелéние;

рáдуйся, я́ко крóтостию твоéю окрыля́еши дýши нáша во éже созерцáти гóрняя.

Рáдуйся, твéрдый вразуми́телю всех отшéдших от Правослáвия;

рáдуйся, любóвию твоéю направля́яй нас на путь прáвый.

Рáдуйся, преподóбне óтче наш Гéрмане, преслáвный чудотвóрче.

Кондак 5

Я́ко звездá во странé полýнощней возсия́л еси́, преподóбне, на óстрове Елóвем, Нóвый Валаáм наречéннем, да озари́ши свéтом любвé твоея́ и богомóщною моли́твою твоéю всю зéмлю Америкáнскую, да со всех концéв ея лю́дие правослáвнии воспою́т тéпле Бóгу: Аллилýиа.

Икос 5

Ви́дяще смирéние твоé, óтче наш Гéрмане, вси дивля́хуся зелó, кáко ты, преподóбному Антóнию Печéрскому, первоначáльнику монáшества на Руси́, подражáя, восхотéл еси́ просты́м и́ноком бы́ти и по вели́кому смирéнию твоемý от служéния свящéнническаго отрéклся еси́. Сегó рáди взывáем ти таковáя:

Рáдуйся, первоначáльниче монáшества во Амéрице;

рáдуйся, смирéнием небéснаго Отéчества дости́гнувый.

Рáдуйся, небéсною слáвою увенчáнный;

рáдуйся, оби́тель на месте пóдвигов твои́х предреки́й.

Рáдуйся, мóщи твоя́ предречéнной оби́тели даровáвый;

рáдуйся, истóчник чудéс от них ми́ру яви́вый.

Рáдуйся, защи́тниче тéплый брáтии, тобóю собирáемыя;

рáдуйся, и́ноком вождь вéлий на брáни неви́димой.

Рáдуйся, преподóбне óтче наш Гéрмане, преслáвный чудотвóрче.

Кондак 6

Проповéдует пусты́ня сéверная пóдвиги и чудесá твоя́, преподóбне, и тя, я́ко нóвую ветвь виногрáдника Цéркве Рýсския, на земли́ Америкáнстей прозя́бшую, прославля́ет. Ты бо дéбри Аля́ски и лесá ея́ моли́твою твоéю облагоухáл еси́ и, подви́жником дрéвним подражáя, в безмóлвии нощнéм взывáл еси́ к Бóгу: Аллилýиа.

Икос 6

Просвети́вый людéй, во тьме язы́честей пребывáющих, и óбраз подви́жническаго жития́ сим показáвый, моли́ся о всех нас, богонóсне óтче наш Гéрмане, да и мы, благодаря́ще Гóспода за ми́лость Егó, нам явлéнную, непрестáнно воспевáем ти похвáльныя сия́ глагóлы:

Рáдуйся, Пресвяты́я Трóицы служи́телю вéрный;

рáдуйся, пусты́ни Елóвыя подви́жниче усéрдный.

Рáдуйся, щит вéры живы́я и разýмныя всем подавáяй;

рáдуйся, тьму свéтом евáнгельским просвещáяй.

Рáдуйся, я́ко суетý и уны́ние богомы́слием отгнáл еси́;

рáдуйся, я́ко убóга себé именýя, смирéнию всех поучáл еси́.

Рáдуйся, сердцá нáша рáдостию твоею́ испóлнивый;

рáдуйся, надéждою благóю нас укрепи́вый

Рáдуйся, преподóбне óтче наш Гéрмане, преслáвный чудотвóрче.

Кондак 7

Хотя́й возсия́ти свéту богопознáния во странé язы́честей, благоволи́ Госпóдь сéяти семенá вéры правослáвныя и повелé тебé, преподóбне, да всех научи́ши вéре и́стинней и защити́ши ю́. Ты же, я́ко пáстырь безстрáшный мáлому стаду евангéльски взывáеши, да не убои́мся, я́ко обетовáно есть нам Небéсное Цáрствие, тéмже научéннии тобóю, рáдостне поéм: Аллилýиа.

Икос 7

Ди́вно в вы́шних моли́твенно пребывáл еси́, преподóбне, но и в ни́жних на земли́ сýщих не забывáл еси́, наипáче же о сиротáх вéлие попечéние яви́л еси́, устроя́я прию́т им и учи́лище, идéже зáповедем Госпóдним поучáл еси́ их. Сих рáди трудóв твои́х приими́ от нас похвалы́ сия́:

Рáдуйся, ни́щих и сирóт защи́тителю;

рáдуйся, блáгостный о них попечи́телю.

Рáдуйся, я́ко стрáху Бóжию чáда своя́ научáл еси́;

рáдуйся, я́ко живóю водóю Евáнгелия всех напоя́л еси́.

Рáдуйся, моли́твы непрестáнныя учи́телю;

рáдуйся, хлéбом небéсным и земны́м сиропитáтелю.

Рáдуйся, плоть покоря́ти дýху поучáвый;

рáдуйся, Бóга всем сéрдцем люби́ти наставля́вый.

Рáдуйся, преподóбне óтче наш Гéрмане, преслáвный чудотвóрче.

Кондак 8

Стрáнное чýдо яви́ человеколю́бец Госпóдь, даровá бо тебé, преподóбне, дар прозрéния и исцелéния я́ко истóчник утешéния лю́дем Свои́м. Ты же свои́ми и словесы́ привéл еси́ мнóгия к любви́ Бóжией. Тéмже си́янием пóдвигов твои́х просвещéннии, лю́дие взывáху ко Гóсподу: Аллилýиа.

Икос 8

Избрáн Бóгом был еси́, óтче преподóбне, тéмже лю́дие новопросвещéннии свéтом Христóвы вéры притекáху к тебé в болéзнех и печáлех. Ты же, я́ко отéц чадолюби́вый, предстáтельствовал еси́ за всех в моли́твах, источáя исцелéния и утешáя всех, к тебé о пóмощи взывáющих, тéмже слáвляху тя духóвная чáда твоя́:

Рáдуйся, душ смятéнных умири́телю преслáдкий;

рáдуйся, врачý наш безмéздный и благодáтный.

Рáдуйся, нéмощей нáших цели́телю милосéрдный;

рáдуйся, в бедáх и обстоя́ниих помóщниче скóрый.

Рáдуйся, лишéнным крóва тéплое прибéжище;

рáдуйся, обуревáемым, я́ко «Скалá Монáшеская», ти́хое пристáнище.

Рáдуйся, грядýщая я́ко настоя́щая прови́девый;

рáдуйся, прегрешéний сокровéнных обличи́телю прозорли́вый.

Рáдуйся, преподóбне óтче наш Гéрмане, преслáвный чудотвóрче.

Кондак 9

Всегó себé Гóсподеви прéдал еси́, блажéнне, тéмже со Áнгелы в пусты́ни слáдостно бесéдовал еси́. И ны́не с ли́ки áнгельскими на Небесéх непрестáнно взывáеши Творцý всех и Создáтелю хвалéбное: Аллилýиа.

Икос 9

Вети́и многовещáннии не возмóгут исчи́слити чудесá твоя́, лю́дем явлéнная, я́ко и дýси нечи́стии по словеси́ твоемý от людéй стрáждущих исхождáху. Егдá же бысть наводнéние вéлие, ты моли́твою своéю пред икóною Бóжия Мáтере останови́л еси́ мóре, глагóля: «Дáлее сея́ черты́ не прéйдет водá». Тéмже ти воспевáем си́це:

Рáдуйся, стихи́и водны́я усмири́телю ди́вный;

рáдуйся, от запалéния леснáго избáвителю преслáвный.

Рáдуйся, святи́теля Иннокéнтия, в мóри взывáвшаго к тебé, услы́шавый;

рáдуйся, по мóрю плáвающим кóрмчий надéжный.

Рáдуйся, я́ко гнев злых людéй ти́хостию исправля́л еси́;

рáдуйся, я́ко ди́вное благоухáние с небесé к тебé прибегáющим ниспосылáл еси́.

Рáдуйся, вéлия знáмения при жи́зни твоéй показáвый;

рáдуйся, и по смéрти твоéй мнóгая чудесá яви́вый.

Рáдуйся, преподóбне óтче наш Гéрмане, преслáвный чудотвóрче.

Кондак 10

Спаси́тельнаго сéяния Госпóдня, в вертогрáде земли́ Америкáнския насаждéннаго, плод крáсный дýхом прови́дя, песнь благодáрственную Пресвятéй Трóице посредé пусты́ни сéверныя возноси́л еси́, óтче святы́й Гéрмане, и со Áнгелы небéсными взывáл еси́: Аллилýиа.

Икос 10

Стенá еси́ всем, прибегáющим к тебé, óтче, я́ко в житии́ твоéм преслáвная показáл еси́, и при кончи́не твоéй ди́вное чýдо яви́л. Лю́дие же, ви́дяще в час кончи́ны твоея́ óгненный столп до небесé и нетлéние телесé твоегó, возопи́ша тебé таковáя:

Рáдуйся, прáведною кончи́ною в свя́тости твоéй нас увéривый;

рáдуйся, я́ко восхождéние твоé на небесá столпóм óгненным знáменася.

Рáдуйся, я́ко и гроб твой недýжным исцелéния источáше;

рáдуйся, мóщи твоя́ благоухáнныя в наслéдие нам остáвивый;

Рáдуйся, я́ко у рáки твоея́ хроми́и востáша и глас твой из грóба слы́шаша.

рáдуйся, я́ко истóчник воды́ святы́я и целéбныя нам даровáл еси́.

Рáдуйся, я́ко стáрцу Герáсиму яви́лся еси́, на Елóвый óстров тогó призывáяй;

рáдуйся, тáинственно, я́ко живы́й, на óстрове сем пребывáяй.

Рáдуйся, преподóбне óтче наш Гéрмане, преслáвный чудотвóрче.

Кондак 11

Пéние хвалéбное тебé принóсим, óтче преподóбне, о прáведнем жити́и твоéм. Восхваля́ем и честнýю кончи́ну твою́, я́ко предузнáл еси́ час преставлéния своегó, учени́к же твой Герáсим обоня́л есть благоухáние ди́вное в час той. Преслáвно бысть и погребéние твоé, егдá испóлнися предречéнное тобóю. Мы же воспевáем чудодéющему Бóгу: Аллилýиа.

Икос 11

Светоподáтельный свети́льник был еси́ всемý и́ноческому чи́ну дáльния Амéрики, преподóбне óтче наш Гéрмане, научáя пóдвигу, защищáя от напáстей, ходáтайствуя о них и глагóля: «Не в морски́х тóкмо волнáх обуревáемся, но среди́ прелéстнаго и многомятéжнаго ми́ра стрáждем и скитáемся, обáче к небéсному нáшему Отéчеству грядéм». Сегó рáди вопиéм ти:

Рáдуйся, вéрный сподви́жниче Иоасáфа, пéрваго епи́скопа Рýсския Амéрики;

рáдуйся, свидéтелю рéвности Иувенáлиевы дáже до смéрти.

Рáдуйся, алеýта Петрá пронареки́й новомýченика;

рáдуйся, предви́девый святи́тельство Иннокéнтия в земли́ Алеýтстей.

Рáдуйся, ученикý своемý Сéргию óбраз и́ноческаго жития́ показáвый;

рáдуйся, и́нока Герáсима на Нóвый Валаáм чудéсно призвáвый.

Рáдуйся, на Руси́, безбóжием пленéнней, Адриáна пресви́тера от темни́цы огради́вый;

рáдуйся, святи́теля Иоáнна тебé прослáвити подви́гнувый.

Рáдуйся, преподóбне óтче наш Гéрмане, преслáвный чудотвóрче.

Кондак 12

Благодáти испóлнена вéдуще тя, преподóбне отче, прóсим: моли́ся тéпле ко Гóсподу, да огради́т Цéрковь Свою́ Святýю от дýха ми́ра сегó, вою́ющаго на сынóв Ея́ невéрием и отвращáющаго от богодаровáнныя жизни, дáбы восходи́ти нам от земли́ на нéбо и воспевáти Бóгу: Аллилýиа.

Икос 12

Пою́ще твоé прославлéние, преподóбне, ублажáем тя, я́ко многомóщна моли́твенника и предстáтеля нáшего. Ты же, стяжáвый Дýха Святáго и Тем просвети́вый лю́ди земли́ Америкáнския, услы́ши нас, вопию́щих к тебé таковáя:

Рáдуйся, моли́тву чи́стую и теплотý сердéчную стяжáвый;

рáдуйся, слéз твои́х течéньми пусты́ни бесплóдное воздéлавый.

рáдуйся, я́ко сéрдце твоé бысть благодáти Бóжия испóлнено.

рáдуйся, свéтом сокровéнным осия́нный.

Рáдуйся, умóм очищéнным тáйны Божéственныя созерцáвый;

рáдуйся, тишины́ и ми́ра пóмыслов дости́гнувый.

Рáдуйся, сердцá Дýхом Святы́м просвещáяй;

рáдуйся, совершéнство обреты́й и нас к сему призывáяй.

Рáдуйся, преподóбне óтче наш Гéрмане, преслáвный чудотвóрче.

Кондак 13

О, преслáвный угóдниче Бóжий, преподóбне и богонóсне óтче наш Гéрмане, приими́ мáлое сиé молéние нáше, в похвалý тебé возноси́мое, и предстоя́ ны́не престóлу Гóспода Вседержи́теля, непрестáнно моли́ся о нас, чáдех твои́х да, пребывáюще в любви́ и единомы́слии, навы́кнем всегдá твори́ти вóлю Бóжию по слову твоему: «От сегó дне, от сегó часá да бýдем люби́ти Бóга превы́ше всегó и твори́ти святýю вóлю Егó», и кýпно с тобóю сподóбимся воспевáти хвалéбную песнь: Аллилýиа.

Молитва

О, преди́вный угóдниче Бóжий, преподóбне óтче наш Гéрмане, ты пóдвигом дóбрым подвизáлся еси́, хлад и ины́я тяготы́ в земли́ Алеýтстей претерпéл еси́.

Ны́не же испóлнися слóво Госпóдне на тебé, в мáлем вéрным Емý бы́вшем, тéмже и постáви тя Госпóдь я́ко Небéснаго покрови́теля Цéркве Америкáнския. Мы же вси взывáем ти тéплою моли́твою: моли́ся за Цéрковь нáшу Святýю, да огради́т Ю́ Госпóдь от темных сил врáжиих, нас да сохрани́т в чистотé и благочéстии, да утверди́т в вéре крéпкой и несумнéнной. И испроси́ всем нам дýха ми́ра и любвé, дýха крóтости и смирéния, горды́ни отгнáние, от самопревозношéния ограждéние, боля́щим пóмощь и исцелéние, скорбя́щим утешéние, áлчущим прáвды духóвныя пи́щу Небéсную. Да, улучи́вше желáемая, обря́щем прáведное воздая́ние в день Стрáшнаго Судá и со всéми святы́ми воспоéм и прослáвим Живоначáльную Трóицу, Отцá Непости́жимаго, И́стиннаго и Единорóднаго Сы́на и Святáго Утéшителя Дýха, во вéки. Ами́нь.