Свято́е Преображе́ние Го́спода Бо́га и Спа́са на́шего Иису́са Христа́
А҆́ѵгꙋста ѕ҃
Ст҃о́е преѡбраже́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀.
На ма́лѣй вече́рни пое́мъ стїхи̑ры на д҃, гла́съ а҃.
Подо́бенъ: Нбⷭ҇ныхъ чинѡ́въ:
И҆́же съ мѡѷсе́омъ глаго́лавый дре́вле на горѣ̀ сїна́йстѣй ѻ҆́бразы, гл҃го́лѧ: а҆́зъ є҆́смь бг҃ъ сы́й: дне́сь же на горѣ̀ ѳавѡ́рстѣй преѡбра́жсѧ, началоѻбра́зное показꙋ́ѧ, лꙋча́ми ѡ҆блиста́ѧсѧ. Тѣ́мже, хрⷭ҇тѐ, велича́ю твою̀ си́лꙋ. Два́жды.
Пое́мь ѻ҆со́бь твоѧ̑, хрⷭ҇тѐ, ᲂу҆ч҃никѝ, петра̀, і҆а́кѡва и҆ і҆ѡа́нна, во́лею на го́рꙋ си́хъ возве́лъ є҆сѝ, чꙋ́до стра́шное показа́въ, и҆ нестерпи́мое бж҃е́ственнагѡ прише́ствїѧ твоегѡ̀ и҆здале́ча присносꙋ́щное благолѣ́пїе
Твоегѡ̀, хрⷭ҇тѐ, прише́ствїѧ непостижи́магѡ тре́петни бы́вше а҆пⷭ҇ли дре́вле, ни́цъ на зе́млю па́дше, бжⷭ҇твеннѣй твое́й дивлѧ́хꙋсѧ си́лѣ: со́лнца просїѧ́въ свѣтлѣ́е, бл҃же, неизрече́нною си́лою твое́ю.
Сла́ва, и҆ ны́нѣ, гла́съ и҃:
Мра́къ зако́нный свѣ́тлый преѡбраже́нїѧ прїѧ́тъ ѻ҆́блакъ: въ не́мже мѡѷсе́й и҆ и҆лїа̀ бы́вше, и҆ пресвѣ́тлыѧ сла́вы сподо́бльшесѧ, бг҃ꙋ глаго́лахꙋ: ты̀ є҆сѝ бг҃ъ на́шъ, цр҃ь вѣкѡ́въ.
На стїхо́внѣ стїхи̑ры, гла́съ в҃.
Подо́бенъ: До́ме є҆ѵфра́ѳовъ:
Дне́сь хрⷭ҇то́съ на горѣ̀ ѳавѡ́рстѣй а҆да́мово премѣни́въ ѡ҆чернѣ́вшее є҆стество̀, просвѣти́въ бг҃осодѣ́ла.
Сті́хъ: Твоѧ̑ сꙋ́ть нб҃са̀, и҆ твоѧ̑ є҆́сть землѧ̀.
Сїѧ́нїемъ добродѣ́телей просвѣ́щшесѧ вопїе́мъ, на горѣ̀ ст҃ѣ́й зрѧ́ще бжⷭ҇твенное гдⷭ҇не преѡбраже́нїе.
Сті́хъ: Ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋетасѧ.
Со́лнце ᲂу҆́бѡ зе́млю ᲂу҆ѧснѧ́ѧ, а҆́бїе захо́дитъ: хрⷭ҇то́съ же со сла́вою ѡ҆блиста́въ на горѣ̀, мі́ръ просвѣти́лъ є҆́сть.
Сла́ва, и҆ ны́нѣ, гла́съ и҆ подо́бенъ то́йже:
Ви́дѣша на ѳавѡ́рѣ мѡѷсе́й же и҆ и҆лїа̀ ѿ дв҃ы ѻ҆трокови́цы бг҃а воплоща́ема, человѣ́кѡмъ на и҆збавле́нїе.
Тропа́рь, гла́съ з҃:
Преѡбрази́лсѧ є҆сѝ на горѣ̀, хрⷭ҇тѐ бж҃е, показа́вый ᲂу҆ч҃никѡ́мъ твои̑мъ сла́вꙋ твою̀, ꙗ҆́коже можа́хꙋ: да возсїѧ́етъ и҆ на́мъ грѣ̑шнымъ свѣ́тъ тво́й присносꙋ́щный, моли́твами бцⷣы, свѣтода́вче, сла́ва тебѣ̀.
На вели́цѣй вече́рни стїхоло́гїа не быва́етъ, то́кмѡ а҆́ще є҆́сть недѣ́лѧ, тогда̀ пое́мъ каѳі́смꙋ всю̀: а҆́ще въ понедѣ́льникъ, пе́рвый а҆нтїфѡ́нъ.
На Гдⷭ҇и, воззва́хъ, стїхи̑ры, на и҃, самогла́сны, гла́съ д҃, по два́жды.
Космы̀ мона́ха: Пре́жде крⷭ҇та̀ твоегѡ̀, гдⷭ҇и, гора̀ нб҃сѝ подо́бѧщисѧ, и҆ ѻ҆́блакъ ꙗ҆́кѡ сѣ́нь протѧза́шесѧ, тебѣ̀ преѡбразꙋ́ющꙋсѧ, ѿ ѻ҆ц҃а́ же свидѣ́тельствꙋемꙋ: та́мѡ бѣ̀ пе́тръ со і҆а́кѡвомъ и҆ і҆ѡа́нномъ, ꙗ҆́кѡ хотѧ́хꙋ бы́ти съ тобо́ю и҆ во вре́мѧ преда́нїѧ твоегѡ̀, да ви́дѣвше чꙋдеса̀ твоѧ̑, не ᲂу҆страша́тсѧ страда́нїй твои́хъ: и҆̀мже поклони́тисѧ на́мъ въ ми́рѣ сподо́би, вели́кїѧ ра́ди твоеѧ̀ ми́лости.
Пре́жде крⷭ҇та̀ твоегѡ̀, гдⷭ҇и, пои́мь ᲂу҆ч҃никѝ на го́рꙋ высо́кꙋ, преѡбрази́лсѧ є҆сѝ предъ ни́ми, лꙋче́ю си́лы ѡ҆зарѧ́ѧ и҆̀хъ, ѿсю́дꙋ ᲂу҆́бѡ чл҃вѣколю́бїемъ, ѿѻнꙋ́дꙋ вла́стїю, показа́ти хотѧ̀ воскрⷭ҇нїѧ свѣ́тлость: є҆гѡ́же и҆ на́съ, бж҃е, въ ми́рѣ сподо́би, ꙗ҆́кѡ ми́лостивъ и҆ чл҃вѣколю́бецъ.
Гора̀, ꙗ҆́же и҆ногда̀ мра́чна и҆ ды́мна, ны́нѣ же честна̀ и҆ свѧта̀ є҆́сть, на не́йже но́зѣ твоѝ стоѧ́стѣ, гдⷭ҇и: превѣ́чное бо сокрове́нное та́инство напослѣ́докъ ꙗ҆вле́но сотворѝ, стра́шное твоѐ преѡбраже́нїе, петрꙋ̀ и҆ і҆ѡа́ннꙋ и҆ і҆а́кѡвꙋ. И҆̀же такова̀ сїѧ́нїѧ лица̀ твоегѡ̀ не терпѧ́ще, и҆ свѣ́тлости ри́зъ твои́хъ, ни́цъ на лицѣ̀ землѝ покрыва́хꙋсѧ: и҆̀же и҆ ᲂу҆́жасомъ ѡ҆держи́ми, дивлѧ́хꙋсѧ, ви́дѧще мѡѷсе́а и҆ и҆лїю̀, глаго́лющѧ съ тобо́ю, хотѧ̑щаѧ приключи́тисѧ тебѣ̀: и҆ гла́съ ѿ ѻ҆ц҃а̀ свидѣ́тельствоваше, глаго́лѧ: се́й є҆́сть сн҃ъ мо́й возлю́бленный, ѡ҆ не́мже благоизво́лихъ, тогѡ̀ послꙋ́шайте, и҆́же и҆ да́рꙋетъ мі́рови ве́лїю ми́лость.
На горѣ̀ высо́цѣ преѡбра́жсѧ сп҃съ, верхѡ́вныѧ и҆мѣ́ѧ ᲂу҆ченикѝ, пресла́внѡ ѡ҆блиста́лъ є҆́сть, показꙋ́ѧ, ꙗ҆́кѡ высото́ю добродѣ́телей ѡ҆блиста́вше и҆ бж҃е́ственнѣй сла́вѣ сподо́бѧтсѧ, глаго́лющыѧ со хрⷭ҇то́мъ мѡѷсе́й и҆ и҆лїа̀ пока́зовахꙋ, ꙗ҆́кѡ живы́ми и҆ ме́ртвыми ѡ҆блада́етъ. И҆ и҆́же дре́вле зако́номъ и҆ прⷪ҇рѡ́ки глаго́лавый є҆́сть бг҃ъ, є҆мꙋ́же и҆ гла́съ ѻ҆́ч҃ь и҆зъ ѻ҆́блака свѣ́тла послꙋ́шествоваше глаго́лющїй: тогѡ̀ послꙋ́шайте, и҆́же крⷭ҇то́мъ а҆́да плѣни́вша, и҆ мє́ртвымъ да́рꙋюща живо́тъ вѣ́чный.
Сла́ва, и҆ ны́нѣ, гла́съ ѕ҃.
А҆нато́лїа: Проѡбразꙋ́ѧ воскрⷭ҇нїе твоѐ, хрⷭ҇тѐ бж҃е, тогда̀ поѧ́тъ трѝ твоѧ̑ ᲂу҆ч҃никѝ, петра̀ и҆ і҆а́кѡва и҆ і҆ѡа́нна, на ѳавѡ́ръ возше́лъ є҆сѝ. Тебѣ́ же, сп҃се, преѡбразꙋ́ющꙋсѧ, ѳавѡ́рскаѧ гора̀ свѣ́томъ покрыва́шесѧ: ᲂу҆ч҃ницы̀ твоѝ, сло́ве, поверго́ша себѐ до́лꙋ на землѝ, не терпѧ́ще зрѣ́ти неви́димагѡ зра́ка, а҆́гг҃ли слꙋжа́хꙋ стра́хомъ и҆ тре́петомъ, нб҃са̀ ᲂу҆боѧ́шасѧ, землѧ̀ вострепета̀, ви́дѧще на землѝ сла́вы гдⷭ҇а.
Вхо́дъ. Прокі́менъ днѐ.
И҆схо́да чте́нїе. (Глава̀ д҃.)
Речѐ гдⷭ҇ь къ мѡѷсе́ю: взы́ди ко мнѣ̀ на го́рꙋ, и҆ ста́ни та́мѡ, и҆ да́мъ тѝ скрижа̑ли ка́мєнныѧ, зако́нъ и҆ за́пѡвѣди, ꙗ҆̀же написа́хъ взако́нити и҆̀мъ. И҆ воста́въ мѡѷсе́й и҆ і҆исꙋ́съ предстоѧ́й є҆мꙋ̀, взыдо́ша на го́рꙋ бж҃їю. И҆ ста́рцємъ речѐ: безмо́лвствꙋйте та́мѡ, до́ндеже возврати́мсѧ къ ва́мъ, и҆ сѐ а҆арѡ́нъ и҆ ѡ҆́ръ съ ва́ми: а҆́ще комꙋ̀ прилꙋчи́тсѧ сꙋ́дъ, да и҆́дꙋтъ къ ни̑мъ. И҆ взы́де мѡѷсе́й на го́рꙋ, и҆ покры̀ ѻ҆́блакъ го́рꙋ. И҆ сни́де сла́ва бж҃їѧ на го́рꙋ сїна́йскꙋю, и҆ покры̀ ю҆̀ ѻ҆́блакъ ше́сть дне́й, и҆ призва̀ гдⷭ҇ь мѡѷсе́а въ де́нь седмы́й, и҆зъ среды̀ ѻ҆́блака. Видѣ́нїе же сла́вы гдⷭ҇ни, ꙗ҆́кѡ ѻ҆́гнь палѧ̀ на версѣ̀ горы̀, прѧ́мѡ сынѡ́въ і҆и҃левыхъ. И҆ вни́де мѡѷсе́й посредѣ̀ ѻ҆́блака, и҆ взы́де на го́рꙋ: и҆ бѣ̀ та́мѡ на горѣ̀ четы́редесѧть дне́й, и҆ четы́редесѧть ноще́й.
И҆схо́да чте́нїе. (Глава̀ г҃.)
Во дне́хъ ѻ҆́нѣхъ, глаго́ла гдⷭ҇ь къ мѡѷсе́ю лице́мъ къ лицꙋ̀, ꙗ҆́кѡ а҆́ще бы кто̀ возглаго́лалъ къ своемꙋ̀ дрꙋ́гꙋ, и҆ ѿсыла́шесѧ въ по́лкъ: слꙋга́ же і҆исꙋ́съ сы́нъ наѵи́нъ ю҆́ноша не и҆схожда́ше и҆зъ ски́нїи. И҆ речѐ мѡѷсе́й ко гдⷭ҇ꙋ: сѐ ты̀ мнѣ̀ глаго́леши, и҆зведѝ лю́ди сїѧ̑, ты́ же не ꙗ҆ви́лъ мѝ є҆сѝ, є҆го́же по́слеши со мно́ю. Ты́ же мнѣ̀ ре́клъ є҆сѝ: вѣ́мъ тѧ̀ па́че всѣ́хъ, и҆ благода́ть и҆́маши ᲂу҆ менє̀. А҆́ще ᲂу҆́бѡ ѡ҆брѣто́хъ благода́ть предъ тобо́ю, ꙗ҆ви́ ми сама́го тебѐ разꙋ́мнѡ, да ви́жꙋ тѧ̀: ꙗ҆́кѡ да ѡ҆брѣ́тъ бꙋ́дꙋ благода́ть предъ тобо́ю, и҆ да разꙋмѣ́ютъ, ꙗ҆́кѡ лю́дїе твоѝ ꙗ҆зы́къ се́й. И҆ гл҃го́ла є҆мꙋ̀ гдⷭ҇и: а҆́зъ са́мъ пред̾идꙋ̀ предъ тобо́ю, и҆ ᲂу҆поко́ю тѧ̀. И҆ речѐ къ немꙋ̀ мѡѷсе́й: а҆́ще са́мъ ты̀ не ше́ствꙋеши съ на́ми, да не и҆зведе́ши мѧ̀ ѿсю́дꙋ. И҆ ка́кѡ вѣ́домо бꙋ́детъ вои́стиннꙋ, ꙗ҆́кѡ ѡ҆брѣто́хъ благода́ть ᲂу҆ тебє̀, а҆́зъ же и҆ лю́дїе твоѝ, то́чїю и҆дꙋ́щꙋ тѝ съ на́ми; и҆ просла́вленъ бꙋ́дꙋ а҆́зъ же и҆ лю́дїе твоѝ, па́че всѣ́хъ ꙗ҆зы̑къ, є҆ли́цы сꙋ́ть на землѝ. Рече́ же гдⷭ҇ь къ мѡѷсе́ю: сїѐ сло́во твоѐ, є҆́же ре́клъ є҆сѝ, сотворю̀: ѡ҆брѣ́лъ бо є҆сѝ благода́ть предо мно́ю, и҆ вѣ́мъ тѧ̀ па́че всѣ́хъ. И҆ глаго́ла мѡѷсе́й: покажи́ ми сла́вꙋ твою̀. И҆ речѐ: а҆́зъ пред̾идꙋ̀ предъ тобо́ю сла́вою мое́ю, и҆ воззовꙋ̀ ѡ҆ и҆́мени мое́мъ, гдⷭ҇ь предъ тобо́ю, и҆ поми́лꙋю, є҆го́же а҆́ще ми́лꙋю: и҆ ᲂу҆ще́дрю, є҆го́же а҆́ще ще́дрю. И҆ речѐ: не возмо́жеши ви́дѣти лицѐ моѐ: не бо̀ ᲂу҆́зритъ человѣ́къ лицѐ моѐ, и҆ жи́въ бꙋ́детъ. И҆ речѐ гдⷭ҇ь: сѐ мѣ́сто ᲂу҆ менє̀, и҆ ста́неши на ка́мени, до́ндеже ᲂу҆́бѡ пре́йдетъ сла́ва моѧ̀, и҆ положꙋ́ тѧ въ разсѣ́линѣ ка́мене, и҆ покры́ю рꙋко́ю мое́ю надъ тобо́ю до́ндеже мимоидꙋ̀. И҆ ѿимꙋ̀ рꙋ́кꙋ мою̀, и҆ тогда̀ ᲂу҆́зриши за̑днѧѧ моѧ̑, лице́ же моѐ не ꙗ҆ви́ттисѧ. И҆ ᲂу҆́треневавъ мѡѷсе́й, заꙋ́тра взы́де на го́рꙋ сїна́йскꙋю, ꙗ҆́коже глаго́ла є҆мꙋ̀ гдⷭ҇ь. И҆ сни́де гдⷭ҇ь во ѻ҆́блацѣ, и҆ предста̀ є҆мꙋ̀ та́мѡ мѡѷсе́й, и҆ призва̀ и҆́менемъ гдⷭ҇нимъ. И҆ мимои́де гдⷭ҇ь предъ лице́мъ є҆гѡ̀, и҆ призва̀: гдⷭ҇ь бг҃ъ, ще́дръ и҆ ми́лостивъ, долготерпѣли́въ и҆ многоми́лостивъ и҆ и҆́стиненъ. И҆ потща́всѧ мѡѷсе́й прини́къ на зе́млю, поклони́сѧ гдⷭ҇еви.
Ца́рствъ тре́тїихъ чте́нїе. (Глава̀ ѳ҃.)
Во дне́хъ ѻ҆́нѣхъ прїи́де и҆лїа̀ въ вирсаві́ю, ꙗ҆́же є҆́сть землѧ̀ і҆ꙋ́дова, и҆ ѡ҆ста́вь ѻ҆́трочища своего̀ та́мѡ, и҆ са́мъ по́йде въ пꙋсты́ню пꙋ́ть днѐ, и҆ прїи́де и҆ сѣ́де подъ сме́рчїемъ и҆ ᲂу҆́спе, и҆ со́нъ ви́дѣ та́мѡ подъ са́домъ. И҆ сѐ нѣ́кїй прикоснꙋ́сѧ є҆мꙋ̀, и҆ речѐ є҆мꙋ̀: воста́ни, ꙗ҆́ждь и҆ пі́й. И҆ воззрѣ̀ и҆лїа̀: и҆ сѐ при возгла́вїи є҆гѡ̀ ѻ҆прѣсно́къ ꙗ҆чме́нный, и҆ корча́гъ воды̀. И҆ воста̀, и҆ ꙗ҆дѐ, и҆ пи́тъ, и҆ ѡ҆бра́щсѧ ᲂу҆́спе. И҆ ѡ҆бра́щсѧ а҆́гг҃лъ гдⷭ҇ень втори́цею, и҆ коснꙋ́сѧ є҆гѡ̀, и҆ речѐ є҆мꙋ̀: воста́ни, ꙗ҆́ждь и҆ пі́й, ꙗ҆́кѡ мно́гъ ѿ тебє̀ пꙋ́ть. И҆ воста̀, и҆ ꙗ҆дѐ, и҆ пи́тъ: и҆ и҆́де въ крѣ́пости ꙗ҆́ди тоѧ̀ четы́редесѧть дне́й, и҆ четы́редесѧть ноще́й до горы̀ хѡри́вскїѧ. И҆ вни́де та́мѡ въ пеще́рꙋ, и҆ всели́сѧ въ не́й. И҆ сѐ гл҃го́лъ гдⷭ҇ень къ немꙋ̀, и҆ речѐ є҆мꙋ̀ гдⷭ҇ь: и҆зы́ди и҆ ста́ни на горѣ̀ предъ гдⷭ҇емъ. И҆ сѐ гдⷭ҇ь мимои́детъ, и҆ дꙋ́хъ ве́лїй и҆ крѣ́покъ разорѧ́ѧ го́ры, и҆ сокрꙋша́ѧ ка́менїе предъ гдⷭ҇емъ, не въ дꙋ́сѣ гдⷭ҇ь: и҆ по дꙋ́сѣ трꙋ́съ, и҆ не въ трꙋ́сѣ гдⷭ҇ь: и҆ по трꙋ́сѣ ѻ҆́гнь, и҆ не во ѻ҆гнѝ гдⷭ҇ь: и҆ по ѻ҆гнѝ гла́съ хла́да то́нка, и҆ та́мѡ гдⷭ҇ь. И҆ бы́сть ꙗ҆́кѡ ᲂу҆слы́ша и҆лїа̀, покры̀ лицѐ своѐ ми́лѡтїю свое́ю, и҆ и҆зы́де, и҆ ста̀ бли́зъ пеще́ры. И҆ речѐ гдⷭ҇ь къ немꙋ̀: и҆дѝ и҆ возврати́сѧ въ пꙋ́ть тво́й, и҆ по́йдеши въ пꙋ́ть пꙋсты́ни дама́сковы: и҆ пома́жеши є҆лїссе́а, сы́на а҆сафа́това, вмѣ́стѡ тебє̀ прⷪ҇ро́ка.
На лїті́и стїхи̑ры самогла́сны, гла́съ в҃:
И҆́же свѣ́томъ твои́мъ всю̀ вселе́ннꙋю ѡ҆свѣти́въ, на горѣ̀ высо́цѣ преѡбрази́лсѧ є҆сѝ, бл҃же, показа́въ ᲂу҆ченикѡ́мъ твои̑мъ си́лꙋ твою̀, ꙗ҆́кѡ мі́ръ и҆збавлѧ́еши ѿ престꙋпле́нїѧ. Тѣ́мже вопїе́мъ тѝ: милосе́рде гдⷭ҇и, спасѝ дꙋ́шы на́шѧ.
И҆́же на горѣ̀ ѳавѡ́рстѣй преѡбра́жсѧ во сла́вѣ, хрⷭ҇тѐ бж҃е, и҆ показа́въ ᲂу҆ч҃никѡ́мъ твои̑мъ сла́вꙋ твоегѡ̀ бж҃ества̀, ѡ҆зарѝ и҆ на́съ свѣ́томъ твоегѡ̀ разꙋмѣ́нїѧ, и҆ наста́ви на стезю̀ за́повѣдей твои́хъ, ꙗ҆́кѡ є҆ди́нъ бла́гъ и҆ чл҃вѣколю́бецъ.
И҆́же пре́жде со́лнца свѣ́тъ хрⷭ҇то́съ, тѣле́снѣ на землѝ жи́тельствꙋѧ, и҆ пре́жде крⷭ҇та̀ всѧ̑, ꙗ҆̀же стра́шнагѡ смотре́нїѧ, соверши́въ бг҃олѣ́пнѡ, дне́сь на ѳавѡ́рстѣй горѣ̀, та́йнѡ трⷪ҇цы ѻ҆́бразъ показꙋ́ѧ: и҆зѧ̑щныѧ бо трѝ ᲂу҆ченикѝ, петра̀ и҆ і҆а́кѡва и҆ і҆ѡа́нна, на ню̀ возве́лъ є҆сѝ наединѣ̀, и҆ ма́лѡ скры́въ пло́ти воспрїѧ́тїе, преѡбрази́лсѧ є҆сѝ предъ ни́ми, ꙗ҆влѧ́ѧ началоѻбра́зныѧ добро́ты бл҃голѣ́пїе, и҆ то̀ не всесоверше́ннѡ: ѻ҆́во и҆звѣствꙋ́ѧ ты̑ѧ, вкꙋ́пѣ и҆ щадѧ̀, да не ка́кѡ со зра́комъ и҆ є҆́же жи́ти погꙋбѧ́тъ, но ꙗ҆́кѡ можа́хꙋ вмѣща́ти тѣле́сныма ѻ҆чи́ма стерпѧ́ще. И҆ прⷪ҇ро́кѡвъ верхѡ́вныѧ мѡѷсе́а и҆ и҆лїю̀ приве́лъ є҆сѝ, непрекосло́внѣ свидѣ́тельствꙋющыѧ є҆гѡ̀ бж҃ество̀, и҆ ꙗ҆́кѡ то́й є҆́сть и҆́стинное ѻ҆ч҃ескагѡ сꙋщества̀ сїѧ́нїе, гдⷭ҇ствꙋѧй живы́ми и҆ ме́ртвыми. Тѣ́мъ и҆ ѻ҆́блакъ ꙗ҆́коже сѣ́нь ѡ҆б̾ѧ́тъ и҆̀хъ, и҆ гла́съ свы́ше ѻ҆́ч҃ь и҆зъ ѻ҆́блака шꙋ́мнѡ предсвидѣ́тельствꙋющъ и҆ глаго́лющъ: се́й є҆́сть, є҆го́же нетлѣ́ннѡ и҆зъ чре́ва пре́жде денни́цы роди́хъ, сн҃ъ возлю́бленный мо́й, є҆го́же посла́хъ спастѝ, во ѻ҆ц҃а̀ и҆ сн҃а и҆ дх҃а ст҃а́гѡ креща́ємыѧ, и҆ и҆сповѣ́дающыѧ вѣ́рнѡ, ꙗ҆́кѡ нераздѣ́льна є҆́сть є҆ди́на держа́ва бж҃ества̀, тогѡ̀ послꙋ́шайте. Са́мъ ᲂу҆́бѡ, чл҃вѣколю́бче хрⷭ҇тѐ бж҃е, и҆ на́съ ѡ҆зарѝ свѣ́томъ непристꙋ́пныѧ твоеѧ̀ сла́вы, и҆ досто́йны покажѝ наслѣ́дники безконе́чнагѡ црⷭ҇твїѧ твоегѡ̀, ꙗ҆́кѡ пребл҃гъ.
Сла́ва, гла́съ є҃.
Прїиди́те, взы́демъ на го́рꙋ гдⷭ҇ню, и҆ въ до́мъ бг҃а на́шегѡ, и҆ ᲂу҆́зримъ сла́вꙋ преѡбраже́нїѧ є҆го̀, сла́вꙋ ꙗ҆́кѡ є҆диноро́днагѡ ѿ ѻ҆ц҃а̀: свѣ́томъ прїи́мемъ свѣ́тъ, и҆ возвы́шени бы́вше дх҃омъ, трⷪ҇цꙋ є҆диносꙋ́щнꙋю воспои́мъ во вѣ́ки.
И҆ ны́нѣ, гла́съ то́йже:
Зако́на и҆ прⷪ҇ро́кѡвъ тѧ̀, хрⷭ҇тѐ, творца̀ и҆ и҆спо́лнителѧ свидѣ́тельствоваша, зрѧ́ще во ѻ҆́блацѣ, мѡѷсе́й бг҃ови́децъ и҆ и҆лїа̀ ѻ҆гнеколесни́чникъ и҆ неѡпа́льный нб҃оше́ственникъ, въ преѡбраже́нїи твое́мъ. Съ ни́миже и҆ на́съ твоегѡ̀ просвѣще́нїѧ сподо́би, влⷣко, пѣ́ти тѧ̀ во вѣ́ки.
На стїхо́внѣ стїхи̑ры самогла́сны, гла́съ а҃.
И҆́же дре́вле съ мѡѷсе́омъ глаго́лавый на горѣ̀ сїна́йстѣй ѻ҆́бразы, а҆́зъ є҆́смь, глаго́лѧ, сы́й: дне́сь на горѣ̀ ѳавѡ́рстѣй преѡбра́жсѧ предъ ᲂу҆ч҃никѝ, показа̀ началоѻбра́знꙋю добро́тꙋ зра́ка, въ себѣ̀ воспрїи́мъ человѣ́ческое сꙋщество̀: и҆ таковы́ѧ бл҃года́ти свидѣ́тели поста́вль, мѡѷсе́а и҆ и҆лїю̀, ѻ҆́бщники творѧ́ше весе́лїѧ, провозвѣща́ющыѧ сла́вное крⷭ҇та̀ ра́ди, и҆ спаси́тельное воскрⷭ҇нїе.
Сті́хъ: Твоѧ̑ сꙋ́ть нб҃са̀, и҆ твоѧ̀ є҆́сть землѧ̀.
Твоегѡ̀ є҆диноро́днагѡ сн҃а прови́дѣвъ дх҃омъ плотско́е къ человѣ́кѡмъ прише́ствїе, бг҃оѻте́цъ дв҃дъ, и҆здале́ча къ весе́лїю созыва́етъ тва́рь и҆ прⷪ҇ро́чески взыва́етъ: ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋютсѧ. На сїю́ бо возше́дъ го́рꙋ, сп҃се, со ᲂу҆ч҃никѝ твои́ми, ѡ҆чернѣ́вшее а҆да́мово є҆стество̀, преѡбра́жсѧ, ѡ҆блиста́ти па́ки сотвори́лъ є҆сѝ, претвори́въ є҆̀ въ твоегѡ̀ бж҃ества̀ сла́вꙋ же и҆ свѣ́тлость. Тѣ́мже вопїе́мъ тѝ: содѣ́телю всѧ́ческихъ, гдⷭ҇и, сла́ва тебѣ̀.
Сті́хъ: Ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋетасѧ.
Неѡдержи́мое твоегѡ̀ свѣтоли́тїѧ, и҆ непристꙋ́пное бж҃ества̀, зрѧ́ще а҆пⷭ҇лѡвъ лꙋ́чшїи, на горѣ̀ преѡбраже́нїѧ, безнача́льне хрⷭ҇тѐ, бжⷭ҇твеннымъ и҆змѣни́шасѧ ᲂу҆́жасомъ, и҆ ѻ҆́блакомъ ѡ҆сїѧ́вшесѧ свѣ́тлымъ, гла́съ слы́шахꙋ ѻ҆́ч҃ь, и҆звѣствꙋ́ющъ та́инство твоегѡ̀ вочл҃вѣ́ченїѧ, ꙗ҆́кѡ є҆ди́нъ є҆сѝ и҆ по воплоще́нїи, сн҃ъ є҆диноро́дный, и҆ сп҃съ мі́ра.
Сла́ва, и҆ ны́нѣ, гла́съ ѕ҃:
Петрꙋ̀ и҆ і҆а́кѡвꙋ и҆ і҆ѡа́ннꙋ, лꙋ́чшымъ ᲂу҆ч҃никѡ́мъ твои̑мъ, гдⷭ҇и, дне́сь показа́лъ є҆сѝ на горѣ̀ ѳавѡ́рстѣй сла́вꙋ бжⷭ҇твеннагѡ твоегѡ̀ зра́ка: ви́дѧхꙋ бо ри̑зы твоѧ̑ ѡ҆блиста́вшыѧ ꙗ҆́кѡ свѣ́тъ, и҆ лицѐ твоѐ па́че со́лнца: не терпѧ́ще зрѣ́ти нестерпи́мое твоегѡ̀ сїѧ́нїѧ, на зе́млю низпа́дахꙋ, ника́коже зрѣ́ти могꙋ́ще. Гла́съ же слы́шахꙋ свидѣ́тельствꙋющъ свы́ше: се́й є҆́сть сн҃ъ мо́й возлю́бленный, прише́дый въ мі́ръ спастѝ человѣ́ка.
На благослове́нїи хлѣ́бѡвъ, тропа́рь, гла́съ з҃:
ППреѡбрази́лсѧ є҆сѝ на горѣ̀, хрⷭ҇тѐ бж҃е, показа́вый ᲂу҆ч҃никѡ́мъ твои̑мъ сла́вꙋ твою̀, ꙗ҆́коже можа́хꙋ: да возсїѧ́етъ и҆ на́мъ грѣ̑шнымъ свѣ́тъ тво́й присносꙋ́щный, моли́твами бцⷣы, свѣтода́вче, сла́ва тебѣ̀. Три́жды.
И҆ чте́нїе пра́здника.
На ᲂу҆́трени, на Бг҃ъ гдⷭ҇ь, тропа́рь пра́здника, три́жды.
По а҃-й стїхоло́гїи сѣда́ленъ, гла́съ д҃:
Подо́бенъ: Оу҆диви́сѧ і҆ѡ́сифъ:
Человѣ́ческое и҆змѣне́нїе, є҆́же со сла́вою твое́ю, сп҃се, второ́е и҆ стра́шное твоегѡ̀ прише́ствїѧ показꙋ́ѧй, на горѣ̀ ѳавѡ́рстѣй преѡбрази́лсѧ є҆сѝ: и҆лїа̀ и҆ мѡѷсе́й глаго́лахꙋ съ тобо́ю, и҆ трїе́хъ ѿ ᲂу҆ч҃ни̑къ спризва́въ, и҆̀же ви́дѣвше, влⷣко, сла́вꙋ твою̀, блиста́нїю твоемꙋ̀ ᲂу҆диви́шасѧ. И҆́же тогда̀ си̑мъ свѣ́тъ тво́й возсїѧ́вый, просвѣтѝ дꙋ́шы на́шѧ.
Сла́ва, и҆ ны́нѣ, то́йже.
По в҃-й стїхоло́гїи сѣда́ленъ, гла́съ и҆ подо́бенъ то́йже:
На горѣ̀ ѳавѡ́рстѣй преѡбрази́лсѧ є҆сѝ, і҆и҃се, и҆ ѻ҆́блакъ свѣ́телъ протѧза́ющсѧ ꙗ҆́кѡ сѣ́нь, а҆пⷭ҇лы сла́вою покры̀: тѣ́мже и҆ на зе́млю ни́цъ па́дахꙋ, не терпѧ́ще зрѣ́ти свѣ́тлости непристꙋ́пныѧ сла́вы лица̀ твоегѡ̀, безнача́льне сп҃се хрⷭ҇тѐ бж҃е. И҆́же тогда̀ си̑мъ свѣ́тъ тво́й возсїѧ́вый, просвѣтѝ дꙋ́шы на́шѧ.
Сла́ва, и҆ ны́нѣ, то́йже.
По полѷеле́и сѣда́ленъ, гла́съ то́йже.
Подо́бенъ: Вознесы́йсѧ:
Возше́дъ со ᲂу҆ч҃никѝ на го́рꙋ, и҆ во сла́вѣ ѻ҆́ч҃и ѡ҆блиста́въ, съ мѡѷсе́омъ и҆лїа̀ тебѣ̀ предстоѧ́тъ: зако́нъ и҆ прⷪ҇ро́цы бо ꙗ҆́кѡ бг҃ꙋ слꙋ́жатъ, и҆ сн҃овство̀ є҆сте́ственное роди́тель и҆сповѣ́даѧ, нарица́ше сн҃а, є҆го́же воспѣва́емъ съ тобо́ю и҆ дх҃омъ.
Сла́ва, и҆ ны́нѣ, гла́съ и҃.
Подо́бенъ: Повелѣ́нное:
Сокрове́ннꙋю мо́лнїю подъ пло́тїю сꙋщества̀ твоегѡ̀, хрⷭ҇тѐ, и҆ бжⷭ҇твеннагѡ благолѣ́пїѧ, на ст҃ѣ́й показа́лъ є҆сѝ горѣ̀, бл҃годѣ́телю, просїѧ́въ сꙋ́щымъ съ тобо́ю ᲂу҆ч҃никѡ́мъ: и҆ разꙋмѣ́вше нестерпи́мꙋ сꙋ́щꙋ сла́вꙋ твою̀, ст҃ъ є҆сѝ, возопи́ша, ꙗ҆́кѡ непристꙋ́пенъ сы́й, ви́дѣнъ бы́лъ є҆сѝ пло́тїю мі́рови, є҆ди́не чл҃вѣколю́бче.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ гла́съ д҃:
Ѳавѡ́ръ и҆ є҆рмѡ́нъ ѡ҆ и҆́мени твое́мъ возра́дꙋетасѧ.
Сті́хъ: Твоѧ̑ сꙋ́ть небеса̀ и҆ твоѧ̀ є҆́сть землѧ̀.
Е҆ѵⷢ҇лїе лꙋкѝ, зача́ло м҃є.
По н҃-мъ ѱалмѣ̀. Сла́ва:
Всѧ́чєскаѧ дне́сь ра́дости и҆спо́лнишасѧ, хрⷭ҇то́съ преѡбрази́сѧ предъ ᲂу҆ч҃никѝ.
И҆ ны́нѣ, то́йже.
Стїхи́ра самогла́сна, гла́съ є҃:
Бжⷭ҇тва̀ твоегѡ̀, сп҃се, ма́лꙋ зарю̀ ѡ҆бнажи́въ совозше́дшымъ съ тобо́ю на го́рꙋ, премі́рныѧ твоеѧ̀ сла́вы сотвори́лъ є҆сѝ рачи́тели. Тѣ́мже ᲂу҆жа́снѡ зовѧ́хꙋ: добро̀ є҆́сть на́мъ здѣ̀ бы́ти. Съ ни́миже и҆ мы̀ тебѐ преѡбра́жшагосѧ сп҃са хрⷭ҇та̀ пое́мъ во вѣ́ки.
Канѡ́на два̀: Кѵ́ръ космы̀, гла́съ д҃: и҆ кѵ́ръ і҆ѡа́нна, гла́съ и҃: і҆рмосы̀ ѻ҆бою̀ канѡ́нѡвъ по два́жды: тропарѝ всѝ пое́мъ на в҃і.
Канѡ́нъ. Гла́съ д҃.
Пѣ́снь а҃.
І҆рмо́съ: Ли́цы і҆и҃льтестїи невла́жными стопа́ми, по́нтъ чермны́й, и҆ вла́жнꙋю глꙋбинꙋ̀ прогна́вше, вса́дники трїста́ты врагѝ ви́дѧще въ не́й погрꙋже́ны, съ весе́лїемъ поѧ́хꙋ: пои́мъ бг҃ꙋ на́шемꙋ, ꙗ҆́кѡ просла́висѧ.
Глаго́лы живѡ́тныѧ дрꙋгѡ́мъ хрⷭ҇то́съ, и҆ ѡ҆ бжⷭ҇твеннѣмъ наказꙋ́ѧ црⷭ҇твїи, речѐ: во мнѣ̀ ѻ҆ц҃а̀ позна́йте, свѣ́томъ ꙗ҆́кѡ ѡ҆блиста́ѧ непристꙋ́пнымъ, въ ра́дости пою́ще: пои́мъ бг҃ꙋ на́шемꙋ, ꙗ҆́кѡ просла́висѧ.
Си́лою ꙗ҆зы̑къ ѡ҆блече́тесѧ, дрꙋ́зи ᲂу҆ч҃ницы̀, чꙋ́дни же бꙋ́дете въ бога́тствѣ и҆́хъ, ꙗ҆́кѡ сла́вы напо́лнитесѧ: ꙗ҆́кѡ ꙗ҆влю́сѧ свѣтлѣ́е со́лнца ѡ҆блиста́ѧ въ ра́дости пою́щихъ: пои́мъ бг҃ꙋ на́шемꙋ, ꙗ҆́кѡ просла́висѧ.
Дне́сь хрⷭ҇то́съ на горѣ̀ ѳавѡ́рстѣй просїѧ́въ ꙗ҆́снѡ бж҃е́ственною заре́ю, ꙗ҆́коже ѡ҆бѣща́сѧ, ᲂу҆ч҃никѡ́мъ ѡ҆бнажѝ зра́къ: свѣтоно́сныѧ же напо́лнишасѧ бжⷭ҇твенныѧ зарѝ, въ ра́дости поѧ́хꙋ: пои́мъ бг҃ꙋ на́шемꙋ, ꙗ҆́кѡ просла́висѧ.
Дрꙋгі́й канѡ́нъ. Гла́съ и҃.
Пѣ́снь а҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Мѡѷсе́й на мо́рѣ прⷪ҇ро́чески ви́дѣвъ ѻ҆́блакомъ и҆ столпо́мъ дре́вле ѻ҆́гненнымъ сла́вꙋ гдⷭ҇ню, вопїѧ́ше: и҆зба́вителю и҆ бг҃ꙋ на́шемꙋ пои́мъ.
Ꙗ҆́кѡ ка́менемъ тѣ́ломъ покры́всѧ, ѡ҆боже́нїемъ неви́димагѡ зрѧ̀, мѡѷсе́й бг҃ови́децъ, взыва́ше: и҆зба́вителю и҆ бг҃ꙋ на́шемꙋ пои́мъ.
Ты̀ на горѣ̀ зако́ннѣй, и҆ на ѳавѡ́рстѣй ви́дѣнъ бы́лъ є҆сѝ мѡѷсе́емъ во мра́цѣ дре́вле, во свѣ́тѣ же ны́нѣ непристꙋ́пнѣмъ бжⷭ҇тва̀.
Катава́сїа: Крⷭ҇тъ начерта́въ мѡѷсе́й:
Пѣ́снь г҃.
І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Во всего̀ а҆да́ма ѡ҆бле́ксѧ, хрⷭ҇тѐ, ѡ҆чернѣ́вшее и҆змѣни́въ просвѣти́лъ є҆сѝ дре́вле є҆стество̀, и҆ и҆змѣне́нїемъ зра́ка твоегѡ̀ бг҃осодѣ́лалъ є҆сѝ.
Столпо́мъ ѻ҆гнезра́чнымъ, и҆ ѻ҆́блакомъ дре́вле, и҆́же въ пꙋсты́ни і҆и҃лѧ веды́й, дне́сь на горѣ̀ ѳавѡ́рстѣй, неизрече́ннѡ во свѣ́тѣ хрⷭ҇то́съ просїѧ̀.
И҆́нъ.
І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Ѡ҆сѣнѧ́ющаѧ сла́ва, въ сѣ́ни пе́рвѣе, и҆ мѡѷсе́еви бесѣ́дꙋющи твоемꙋ̀ ᲂу҆го́дникꙋ, ѻ҆́бразъ бы́сть ѡ҆блиста́вшагѡ неизрече́ннѡ, на ѳавѡ́рѣ, влⷣко, твоегѡ̀ преѡбраже́нїѧ.
Совзыдо́ша тѝ, сло́ве є҆диноро́дный, вы́шнїи а҆пⷭ҇льстїи версѝ, на го́рꙋ ѳавѡ́рскꙋю: и҆ сопредста́ша тѝ мѡѷсе́й же и҆ и҆лїа̀, ꙗ҆́кѡ бж҃їѧ слꙋги̑, є҆ди́не чл҃вѣколю́бче.
Бг҃ъ сло́во сы́й, ве́сь зе́мленъ бы́сть, всемꙋ̀ бжⷭ҇твꙋ̀ смѣси́въ человѣ́чество, во ѵ҆поста́си свое́й: ю҆́же во двою̀ сꙋщєствꙋ̀ мѡѷсе́й и҆ и҆лїа́ же ви́дѣша на горѣ̀ ѳавѡ́рѣ.
Сѣда́ленъ, гла́съ д҃.
Подо́бенъ: Оу҆диви́сѧ і҆ѡ́сифъ:
На горѣ̀ ѳавѡ́рстѣй преѡбрази́лсѧ є҆сѝ, і҆и҃се, посредѣ̀ и҆лїѝ и҆ мѡѷсе́а, премꙋ́дрыхъ, со і҆а́кѡвомъ, и҆ петро́мъ и҆ і҆ѡа́нномъ. Пе́тръ же разꙋмѣ́ѧ, сїѧ̑ тебѣ̀ глаго́лаше: добро̀ здѣ̀ є҆́сть сотвори́ти трѝ сѣ̑ни, є҆ди́нꙋ мѡѷсе́ю, и҆ є҆ди́нꙋ и҆лїѝ, и҆ є҆ди́нꙋ тебѣ̀ влⷣцѣ хрⷭ҇тꙋ̀. И҆́же тогда̀ свѣ́тъ тво́й си̑мъ возсїѧ́вый, просвѣтѝ дꙋ́шы на́шѧ.
Сла́ва, и҆ ны́нѣ, то́йже.
Пѣ́снь д҃.
І҆рмо́съ: Оу҆слы́шахъ сла́вное смотре́нїе твоѐ, хрⷭ҇тѐ бж҃е, ꙗ҆́кѡ роди́лсѧ є҆сѝ ѿ дв҃ы, да ѿ ле́сти и҆зба́виши зовꙋ́щыѧ: сла́ва си́лѣ твое́й, гдⷭ҇и.
Зако́нъ въ сїна́и писа́нїемъ воѡбража́ѧ, хрⷭ҇тѐ бж҃е, во ѻ҆́блацѣ, и҆ ѻ҆гнѝ, и҆ мра́цѣ, и҆ въ ви́хрѣ ꙗ҆ви́лсѧ є҆сѝ носи́мь: сла́вѣ си́лѣ твое́й, гдⷭ҇и.
Да ᲂу҆вѣ́риши сла́вное строе́нїе твоѐ, хрⷭ҇тѐ бж҃е, ꙗ҆́кѡ сы́й пре́жде вѣ̑къ, и҆ то́йже на ѻ҆́блацѣ восхожде́нїе положи́вый, на ѳавѡ́рѣ неизрече́ннѡ просїѧ́лъ є҆сѝ.
Соглаго́люще предстоѧ́хꙋ раболѣ́пнѡ тебѣ̀ влⷣцѣ хрⷭ҇тꙋ̀, къ ни́мже па́рою ѻ҆гнѧ̀ и҆ мра́ка, и҆ то́нкимъ хла́домъ бесѣ́довалъ є҆сѝ: сла́ва си́лѣ твое́й, гдⷭ҇и.
Возвѣща́хꙋ сла́вное крⷭ҇та̀ ра́ди твоегѡ̀, на ѳавѡ́ръ прише́дше, и҆́же во ѻ҆гни́ тѧ и҆ кꙋпинѣ̀ дре́вле предви́дѣвый мѡѷсе́й, и҆ взѧ́тый на колесни́цѣ ѻ҆́гненнѣй и҆лїа̀, хрⷭ҇тѐ.
И҆́нъ.
І҆рмо́съ: И҆зъ пло́ти твоеѧ̀ лꙋчѝ бжⷭ҇тва̀ и҆схожда́хꙋ, прⷪ҇ро́кѡмъ и҆ а҆пⷭ҇толѡмъ. Тѣ́мъ нача̑льницы пою́ще взыва́хꙋ: сла́ва си́лѣ твое́й, гдⷭ҇и.
И҆́же кꙋпинꙋ̀ сохрани́вый неврежде́нꙋ, прикоснꙋ́вшꙋюсѧ ѻ҆гню̀, мѡѷсе́ю бг҃осїѧ́ннꙋю пло́ть показа́лъ є҆сѝ, влⷣко, пою́щемꙋ: сла́ва си́лѣ твое́й, гдⷭ҇и.
Скры́сѧ заре́ю бжⷭ҇тва̀ чꙋ́вственное со́лнце, ꙗ҆́кѡ на горѣ̀ ѳавѡ́рѣ ви́дѣвъ тѧ̀ преѡбразꙋ́ющасѧ, і҆и҃се мо́й: сла́ва си́лѣ твое́й, гдⷭ҇и.
Ѻ҆́гнь не ѡ҆палѧ́ѧ ве́щи тѣле́сныѧ, ви́дѣнъ бы́сть невеще́ственъ: ꙗ҆́коже мѡѷсе́ю и҆ а҆пⷭ҇толѡмъ ꙗ҆ви́лсѧ є҆сѝ, и҆лїи́ же, влⷣко, є҆ди́нъ ѿ двою̀, во двꙋ̀ соверше́ннꙋ є҆стєствꙋ̀.
Пѣ́снь є҃.
І҆рмо́съ: Ѿ свѣ́та пресѣкі́й перворо́дный свѣ́тъ, ꙗ҆́кѡ во свѣ́тѣ дѣла̀ пою́тъ тѧ̀, хрⷭ҇тѐ, содѣ́телѧ, во свѣ́тѣ твое́мъ пꙋти̑ на́шѧ напра́ви.
Предъ лице́мъ твои́мъ го́ры ᲂу҆клони́шасѧ: свѣ́тъ бо и҆ предъ нога́ми, нб҃отє́чныѧ лꙋчѝ, хрⷭ҇тѐ, со́лнца прїи́де, зра́къ зе́мленъ ꙗ҆́кѡ прїѧ́ти благоволи́лъ є҆сѝ.
Сѐ сп҃съ, вопїѧ́хꙋ мѡѷсе́й и҆ и҆лїа̀, ᲂу҆ч҃никѡ́мъ на горѣ̀ ст҃ѣ́й ѳавѡ́рстѣй ѡ҆глаша́ємымъ, хрⷭ҇то́съ, є҆го́же дре́вле провозвѣсти́хомъ сꙋ́щаго бг҃а.
Неизмѣ́нное є҆стество̀, человѣ́ческомꙋ примѣ́шсѧ, ѻ҆би́льнѡ невеще́ственнагѡ бжⷭ҇тва̀, свѣ́тъ, и҆з̾ѡбнажи́въ а҆пⷭ҇лѡмъ, неизрече́ннѡ возсїѧ̀.
Тѧ̀ присносꙋ́щное сїѧ́нїе, во ѻ҆ч҃естѣй сла́вѣ, ᲂу҆ч҃ницы̀ ꙗ҆́кѡ ви́дѣвше возсїѧ́вша, хрⷭ҇тѐ, тебѣ̀ вопїѧ́хꙋ: во свѣ́тѣ твое́мъ пꙋти̑ на́шѧ напра́ви.
И҆́нъ.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ.
Вѣті́йствꙋющїй ѧ҆зы́къ твоегѡ̀ вели́чества не мо́жетъ вѣща́ти: ꙗ҆́кѡ бо держа́й живо́тъ, и҆ сме́ртїю влады́й, предста́вилъ є҆сѝ, на ѳавѡ́рстѣй горѣ̀ мѡѷсе́а и҆ и҆лїю̀, свидѣ́тельствꙋющыѧ твоѐ бж҃ество̀.
И҆́же рꙋка́ми неви́димыми созда́въ по ѻ҆́бразꙋ твоемꙋ̀, хрⷭ҇тѐ, человѣ́ка, началоѻбра́знꙋю твою̀ въ созда́нїи добро́тꙋ показа́лъ є҆сѝ: не ꙗ҆́кѡ во ѻ҆́бразѣ, но ꙗ҆́кѡ са́мъ сы́й по сꙋществꙋ̀, бг҃ъ бы́лъ є҆сѝ и҆ чл҃вѣ́къ.
Сраствори́всѧ неслїѧ́ннѡ, ᲂу҆́гль горѧ́щь показа́лъ є҆сѝ на́мъ бжⷭ҇тва̀, попалѧ́ющь ᲂу҆́бѡ грѣхѝ, дꙋ́шы же просвѣща́ющь, на ѳавѡ́рстѣй горѣ̀: мѡѷсе́а со и҆лїе́ю, ᲂу҆ч҃никѡ́въ же старѣ́йшыѧ ᲂу҆диви́лъ є҆сѝ.
Пѣ́снь ѕ҃.
І҆рмо́съ: Внегда̀ скорбѣ́ти мѝ, возопи́хъ ко гдⷭ҇ꙋ, и҆ ᲂу҆слы́ша мѧ̀ бг҃ъ спасе́нїѧ моегѡ̀.
Сїѧ́нїѧ па́че со́лнца, свѣ́тъ ꙗ҆снѣ́йшїй, сп҃съ просїѧ̀ на ѳавѡ́рѣ, на́съ просвѣти́лъ є҆́сть.
Возше́дъ на го́рꙋ ѳавѡ́рскꙋю, преѡбрази́лсѧ є҆сѝ, хрⷭ҇тѐ, и҆ ле́сть всю̀ ѡ҆мрачи́въ, на́съ просвѣти́лъ є҆сѝ.
Тѧ̀ бг҃а позна́вше сла́внїи а҆пⷭ҇ли, на ѳавѡ́рѣ же, хрⷭ҇тѐ, ᲂу҆ди́вльшесѧ, колѣ̑на преклони́ша.
И҆́нъ.
І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Ꙗ҆́кѡ ве́лїе и҆ стра́шное ᲂу҆зрѣ́сѧ видѣ́нїе дне́сь, съ нб҃сѐ ᲂу҆́бѡ чꙋ́вственное ѿ земли́ же несравне́нное, ѡ҆блиста̀ сл҃нце пра́вды мы́сленное на горѣ̀ ѳавѡ́рстѣй.
Пре́йде ᲂу҆́бѡ сѣ́нь зако́ннаѧ, и҆знемо́гшаѧ, прїи́де же ꙗ҆́вѣ хрⷭ҇то́съ и҆́стина, мѡѷсе́й возопѝ, на ѳавѡ́рѣ ви́дѣвъ твоѐ бж҃ество̀.
Сто́лпъ ѻ҆́гненный, хрⷭ҇та̀ преѡбразꙋ́ющасѧ, ѻ҆́блакъ же ꙗ҆́вѣ благода́ть дх҃а, ѡ҆сѣни́вшꙋю на ѳавѡ́рѣ предсказа́ша ꙗ҆вле́ннѣйше.
Конда́къ, гла́съ з҃.
Самогла́сенъ: На горѣ̀ преѡбрази́лсѧ є҆сѝ, и҆ ꙗ҆́коже вмѣща́хꙋ ᲂу҆ч҃ницы̀ твоѝ, сла́вꙋ твою̀, хрⷭ҇тѐ бж҃е, ви́дѣша: да є҆гда́ тѧ ᲂу҆́зрѧтъ распина́ема, страда́нїе ᲂу҆́бѡ ᲂу҆разꙋмѣ́ютъ во́льное, мі́рови же проповѣ́дѧтъ: ꙗ҆́кѡ ты̀ є҆сѝ вои́стиннꙋ ѻ҆́ч҃ее сїѧ́нїе.
І҆́косъ: Воста́ните, лѣни́вїи, и҆̀же всегда̀ ни́зꙋ пони́кшїи въ зе́млю, дꙋшѝ моеѧ̀ по́мыслы, возми́тесѧ и҆ возвы́ситесѧ на высотꙋ̀ бжⷭ҇твеннагѡ восхожде́нїѧ. Притеце́мъ къ петрꙋ̀ и҆ къ зеведе́євымъ, и҆ вкꙋ́пѣ со ѻ҆́нѣми ѳавѡ́рскꙋю го́рꙋ дости́гнемъ, да ви́димъ съ ни́ми сла́вꙋ бг҃а на́шегѡ, гла́съ же ᲂу҆слы́шимъ, и҆̀же свы́ше слы́шаша, и҆ проповѣ́даша ѻ҆́ч҃ее сїѧ́нїе.
Пѣ́снь з҃.
І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Ѡ҆блиста́вшесѧ свѣ́томъ непристꙋ́пныѧ сла́вы, на ѳавѡ́рстѣй горѣ̀ а҆пⷭ҇ли, хрⷭ҇тꙋ̀ вопїѧ́хꙋ: ѻ҆тє́цъ на́шихъ бж҃е, бл҃гослове́нъ є҆сѝ.
Сїѧ́нїемъ бжⷭ҇твеннагѡ шꙋ́ма и҆ росода́тельнымъ ѻ҆́блакомъ, хрⷭ҇тѐ, и҆ заре́ю твое́ю наслажда́еми, а҆пⷭ҇ли поѧ́хꙋ: ѻ҆тє́цъ на́шихъ бж҃е, бл҃гослове́нъ є҆сѝ.
Въ непристꙋ́пномъ свѣ́тѣ, ꙗ҆́кѡ ви́дѣ тѧ̀ пе́тръ, на ѳавѡ́рстѣй горѣ̀ ѡ҆блиста́вша, хрⷭ҇тѐ, возопѝ: ѻ҆тє́цъ на́шихъ бж҃е, бл҃гослове́нъ є҆сѝ.
Съ нача́льникомъ жи́зни хрⷭ҇то́мъ сꙋ́ще, дѣ́ти зеведе́евы, ꙗ҆́кѡ и҆спꙋстѝ зра́ка свѣ́тъ, возгремѣ́ша: ѻ҆тє́цъ на́шихъ бж҃е, бл҃гослове́нъ є҆сѝ.
И҆́нъ.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Ны́нѣ ви́дѣна бы́ша а҆пⷭ҇лѡмъ неви́димаѧ бж҃ества̀ во пло́ти, на горѣ̀ ѳавѡ́рстѣй ѡ҆блиста́вша, вопїю́щымъ: бл҃гослове́нъ є҆сѝ, гдⷭ҇и бж҃е, во вѣ́ки.
Оу҆жасо́шасѧ стра́хомъ, ᲂу҆ди́вльшесѧ благолѣ́пїю бж҃е́ственнагѡ црⷭ҇тва, на горѣ̀ ѳавѡ́рстѣй а҆пⷭ҇ли, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Ны́нѣ неꙋслы̑шаннаѧ ᲂу҆слы́шана бы́ша: безъ ѻ҆ц҃а́ бо сн҃ъ ѿ дв҃ы ѻ҆те́ческимъ гла́сомъ сла́внѡ свидѣ́тельствꙋетсѧ, ꙗ҆́кѡ бг҃ъ и҆ чл҃вѣ́къ, то́йже во вѣ́ки.
Положе́нїемъ не бы́лъ є҆сѝ вы́шнѧгѡ, сꙋщество́мъ же сн҃ъ возлю́бленъ, пре́жде сы́й, на́мъ прибли́жилсѧ є҆сѝ непрело́жнѡ: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃.
І҆рмо́съ: Въ вавѷлѡ́нѣ ѻ҆́троцы бжⷭ҇твенною распала́еми ре́вностїю, мꙋчи́телѧ и҆ пла́мене преще́нїе мꙋ́жески попра́ша, и҆ посредѣ̀ ѻ҆гнѧ̀ вве́ржени, ѡ҆роша́еми поѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Манове́нїемъ всѧ̑ носѧ́й, нога́ми пречи́стыми на го́рꙋ взы́де ѳавѡ́рскꙋю хрⷭ҇то́съ: на не́йже па́че со́лнечныѧ лꙋчѝ ѡ҆блиста̀ лице́мъ, и҆̀же зако́нꙋ старѣ́йшыѧ и҆ благода́ти, показа̀ пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Непристꙋ́пною сла́вою, на горѣ̀ ꙗ҆́вльсѧ неизрече́ннѡ ѳавѡ́рстѣй, неѡдержи́мый и҆ незаходи́мый свѣ́тъ, ѻ҆́ч҃ее сїѧ́нїе, тва́рь ᲂу҆ѧсни́въ, человѣ́ки ѡ҆божѝ пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Свѧщеннолѣ́пнѡ стоѧ́ще мѡѷсе́й же и҆ и҆лїа̀ на горѣ̀ ѳавѡ́рѣ, бжⷭ҇твенныѧ начерта́нїе ꙗ҆́снѡ ѵ҆поста́си ви́дѣвше, хрⷭ҇та̀ во ѻ҆ч҃естѣй ѡ҆блиста́вша сла́вѣ, воспѣва́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.
И҆́же во зра́цѣ бжⷭ҇твеннагѡ ра́ди ꙗ҆вле́нїѧ, лицѐ просла́висѧ и҆ногда̀ мѡѷсе́ово: хрⷭ҇то́съ же ꙗ҆́кѡ ри́зою свѣ́томъ и҆ сла́вою ѡ҆дѣва́етсѧ, свѣ́та бо самодѣ́теленъ сы́й, ѡ҆зарѧ́етъ пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Ѿ свѣторо́дна ѻ҆́блака, хрⷭ҇та̀ ᲂу҆ч҃ницы̀ ѡ҆б̾ѧ́та зрѧ́ще на ѳавѡ́рѣ, и҆ ни́цы на зе́млю па́дше, ᲂу҆́мъ просвѣ́щше, со ѻ҆ц҃е́мъ сего̀ поѧ́хꙋ и҆ дх҃омъ: благослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ.
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̑ вѣ́ки.
Оу҆слы́шавше, влⷣко, ѿ ѻ҆ц҃а̀ свидѣ́тельствꙋема, и҆ ꙗ҆́кѡ человѣ́ческа твердѣ́йша зра́ка, зрѣ́ти лица̀ твоегѡ̀ блиста́нїѧ не терпѧ́ще, твоѝ ᲂу҆ченицы̀ на зе́млю ни́цъ па́дахꙋ, со стра́хомъ пою́ще: свѧще́нницы благослови́те, лю́дїе превозноси́те во всѧ̑ вѣ́ки.
Ца́рствꙋющымъ є҆сѝ цр҃ь прекра́сенъ, и҆ и҆̀же всю́дꙋ владѧ́щымъ гдⷭ҇ь си́лѣнъ, бл҃же́нъ, и҆ во свѣ́тѣ живы́й непристꙋ́пнѣмъ. Е҆мꙋ́же ᲂу҆ч҃ницы̀ ᲂу҆ди́вльшесѧ, мѡѷсе́й же и҆ и҆лїа̀, вопїѧ́хꙋ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.
Ꙗ҆́кѡ нб҃омъ владꙋ́щемꙋ, и҆ земле́ю гдⷭ҇ьствꙋющемꙋ, и҆ преиспо́дними ѻ҆́бласть и҆мꙋ́щемꙋ, хрⷭ҇тѐ, предста́ша тѝ, ѿ землѝ ᲂу҆́бѡ а҆пⷭ҇ли, ꙗ҆́кѡ съ нб҃се́ же ѳесві́тѧнинъ и҆лїа̀, мѡѷсе́й же ѿ ме́ртвыхъ, пою́ще согла́снѡ: лю́дїе превозноси́те во всѧ̑ вѣ́ки.
Оу҆ны́нїѧ ражда́ющыѧ печа̑ли на землѝ ѡ҆ста́виша, а҆пⷭ҇лѡвъ и҆збра́ннїи, чл҃вѣколю́бче, ꙗ҆́кѡ тебѣ̀ послѣ́доваша, ко и҆́же ѿ землѝ преложе́нїю бжⷭ҇твеннагѡ житїѧ̀. Тѣ́мже и҆ по достоѧ́нїю твоегѡ̀ бг҃оѧвле́нїѧ ᲂу҆лꙋчи́вше, поѧ́хꙋ: лю́дїе превозноси́те є҆го̀ во вѣ́ки.
На ѳ҃-й пѣ́сни, Честнѣ́йшꙋю, не пое́мъ, а҆́ще и҆ въ недѣ́лю, но пое́мъ припѣ́въ пра́здника.
Велича́й, дꙋшѐ моѧ̀, на ѳавѡ́рѣ преѡбрази́вшагосѧ гдⷭ҇а.
Та́же і҆рмо́съ: Ржⷭ҇тво̀ твоѐ:
Посе́мъ вторы́й ли́къ пое́тъ то́йже припѣ́въ, и҆ і҆рмо́съ. И҆ ко второ́мꙋ канѡ́нꙋ припѣва́ютъ то́йже припѣ́въ.
Пѣ́снь ѳ҃.
І҆рмо́съ: Ржⷭ҇тво̀ твоѐ нетлѣ́ннѡ ꙗ҆ви́сѧ: бг҃ъ и҆зъ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ. Тѧ̀, бцⷣе, тѣ́мъ всѝ велича́емъ.
Оу҆жа́сни но́вымъ свѣтоли́тїемъ внеза́пꙋ ᲂу҆ч҃ницы̀ ѡ҆свѣ́щшесѧ, дрꙋ́гъ дрꙋ́га зрѧ́хꙋ: ᲂу҆ди́вльшесѧ же, и҆ къ землѝ прекло́ншесѧ, тебѣ̀ влⷣцѣ всѣ́хъ поклони́шасѧ.
Шꙋ́мъ и҆зъ ѻ҆́блака посыла́шесѧ бг҃огла́сенъ, и҆звѣствꙋ́ѧ чꙋ́до: ѻ҆ц҃ъ бо свѣ́тѡвъ, се́й є҆́сть сн҃ъ мо́й возлю́бленный, а҆пⷭ҇лѡмъ вопїѧ́ше, тогѡ̀ послꙋ́шайте.
Нѡ́ваѧ ви́дѣвше и҆ пресла̑внаѧ, гла́съ ѻ҆ч҃ескїй внꙋши́вше, на ѳавѡ́рѣ словесѐ слꙋги̑, и҆з̾ѡбраже́нїе первоѻбра́знагѡ, се́й є҆́сть, вопїѧ́хꙋ, сп҃съ на́шъ.
Ѻ҆́бразе непремѣ́нный сꙋ́щагѡ, недви́жиме, печа́ть неизмѣ́нна, сн҃е, сло́ве, мꙋ́дросте и҆ мы́шце, десни́це, вы́шнѧгѡ си́ло, тѧ̀ воспѣва́емъ со ѻ҆ц҃е́мъ же и҆ дх҃омъ.
И҆́нъ.
І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. Тѣ́мже пречи́стꙋю бцⷣꙋ вѣ́рнїи велича́емъ.
Да твоѐ пока́жеши ꙗ҆́вѣ неизрече́нное второ́е сни́тїе, ꙗ҆́кѡ да вы́шнїй бг҃ъ ꙗ҆ви́шисѧ, стоѧ̀ посредѣ̀ богѡ́въ а҆по́стѡлъ на ѳавѡ́рѣ, мѡѷсе́а же и҆ и҆лїю̀ неизрече́ннѡ ѡ҆сїѧ́лъ є҆сѝ. Тѣ́мже всѝ тѧ̀, хрⷭ҇тѐ, велича́емъ.
Прїиди́те, мнѣ̀ покори́тесѧ лю́дїе, возше́дше на го́рꙋ ст҃ꙋ́ю пренбⷭ҇нꙋю, невеще́ственнѡ ста́немъ во гра́дѣ жива́гѡ бг҃а, и҆ ᲂу҆́зримъ мы́сленнѡ бж҃ество̀ невеще́ственное, ѻ҆ц҃а̀ и҆ дх҃а, въ сн҃ѣ є҆диноро́днѣмъ ѡ҆блиста́ющее.
Привле́клъ є҆сѝ любо́вїю мѧ̀, сп҃се, и҆ премѣни́лъ є҆сѝ бжⷭ҇твеннымъ твои́мъ жела́нїемъ: но попалѝ ѻ҆гне́мъ невеще́ственнымъ грѣхѝ моѧ̑, и҆ насы́титисѧ твоеѧ̀ пи́щи сподо́би: да ѻ҆боѐ и҆гра́ѧ, велича́ю, бл҃же, вели̑чїѧ твоѧ̑.
Свѣти́ленъ: Свѣ́те неизмѣ́нный, сло́ве, свѣ́та ѻ҆ц҃а̀ нерожде́нна, въ ꙗ҆вле́ннѣмъ свѣ́тѣ твое́мъ дне́сь на ѳавѡ́рѣ свѣ́тъ ви́дѣхомъ ѻ҆ц҃а̀, свѣ́тъ и҆ дх҃а, свѣ́томъ наставлѧ́ющаго всю̀ тва́рь. Три́жды.
На хвали́техъ, Всѧ́кое дыха́нїе, поста́вимъ стїхѝ д҃, гла́съ д҃.
Подо́бенъ: Зва́нный свы́ше:
Пре́жде честна́гѡ крⷭ҇та̀ твоегѡ̀ и҆ страда́нїѧ, пои́мъ и҆̀хже проразсꙋди́лъ є҆сѝ, ѿ свѧще́нныхъ ᲂу҆ч҃ни̑къ, на ѳавѡ́рскꙋю, влⷣко, возше́лъ є҆сѝ го́рꙋ, показа́ти восхотѣ́въ си̑мъ сла́вꙋ твою̀: и҆̀же и҆ ви́дѣвше тѧ̀ преѡбрази́вшасѧ, и҆ па́че со́лнца просїѧ́вша, ни́цы па́дше, си́лѣ твое́й ᲂу҆диви́шасѧ, взыва́юще: ты̀ безлѣ́тенъ свѣ́тъ є҆сѝ, хрⷭ҇тѐ, и҆ сїѧ́нїе ѻ҆́ч҃ее, а҆́ще и҆ во́лею пло́ть ꙗ҆ви́лсѧ є҆сѝ, неизмѣ́нне. Два́жды.
И҆́же пре́жде вѣ̑къ сы́й бг҃ъ сло́во, и҆́же свѣ́томъ ꙗ҆́кѡ ри́зою ѡ҆дѣва́ѧйсѧ, преѡбразꙋ́ющїйсѧ предъ ᲂу҆ч҃никѝ твои́ми, па́че со́лнца сло́ве, просїѧ́лъ є҆сѝ: мѡѷсе́й же и҆ и҆лїа̀ тебѣ̀ предста́ша, мє́ртвымъ и҆ живы̑мъ тѧ̀ гдⷭ҇а повѣ́дающе, и҆ твоѐ сла́вѧще неизрече́нное смотре́нїе и҆ ми́лость, и҆ мно́гое милосе́рдїе, и҆́мже спа́слъ є҆сѝ мі́ръ, грѣхо́мъ погиба́ющїй.
Ѿ дв҃и́ческагѡ ѻ҆́блака тѧ̀ рожде́на, и҆ пло́ть бы́вша, и҆ на горѣ̀ ѳавѡ́рстѣй преѡбразꙋ́ющасѧ, гдⷭ҇и, и҆ ѻ҆́блакомъ свѣ́тлымъ тѧ̀ ѡ҆крꙋжа́ема, гла́съ роди́телевъ возлю́бленнаго тѧ̀ сн҃а ᲂу҆ч҃никѡ́мъ предстоѧ́щымъ тебѣ̀ ꙗ҆́вѣ ска́зоваше, ꙗ҆́кѡ є҆диносꙋ́щна и҆ є҆динопресто́льна. Тѣ́мже пе́тръ ᲂу҆дивлѧ́ѧсѧ, добро̀ є҆́сть здѣ̀ бы́ти, глаго́лаше, не вѣ́дый є҆́же глаго́лаше, бл҃годѣ́телю многоми́лостиве.
Сла́ва, и҆ ны́нѣ, гла́съ и҃.
Вѷзанті́ево: Поѧ́тъ хрⷭ҇то́съ петра̀, і҆а́кѡва и҆ і҆ѡа́нна, на го́рꙋ высокꙋ̀ є҆ди́ны, и҆ преѡбрази́сѧ предъ ни́ми: и҆ просвѣти́сѧ лицѐ є҆гѡ̀ ꙗ҆́кѡ со́лнце, ри̑зы же є҆гѡ̀ бы́ша бѣлы̀ ꙗ҆́кѡ свѣ́тъ: и҆ ꙗ҆ви́шасѧ мѡѷсе́й и҆ и҆лїа̀ съ ни́мъ глаго́люще, и҆ ѻ҆́блакъ свѣ́телъ ѡ҆сѣнѝ и҆̀хъ. И҆ сѐ гла́съ и҆зъ ѻ҆́блака глаго́лющъ: се́й є҆́сть сн҃ъ мо́й возлю́бленный, ѡ҆ не́мже благоволи́хъ, тогѡ̀ послꙋ́шайте.
Славосло́вїе вели́кое. И҆ ѿпꙋ́стъ.
На лїтꙋргі́и, а҆нтїфѡ́нъ а҃, гла́съ в҃. Сті́хъ а҃.
Ѱало́мъ ѯ҃є: Воскли́кните гдⷭ҇еви всѧ̀ землѧ̀, по́йте же и҆́мени є҆гѡ̀, дади́те сла́вꙋ хвалѣ̀ є҆гѡ̀.
Моли́твами бцⷣы, сп҃се, спасѝ на́съ.
Па́ки дрꙋгі́й ли́къ, то́йже сті́хъ:
Воскли́кните гдⷭ҇еви всѧ̀ землѧ̀:
Моли́твами бцⷣы, сп҃се, спасѝ на́съ.
И҆ па́ки а҃-й ли́къ, сті́хъ в҃-й.
Ѱало́мъ ѻ҃ѕ: Гла́съ гро́ма твоегѡ̀ въ колесѝ, ѡ҆свѣти́ша мѡ́лнїѧ твоѧ̀ вселе́ннꙋю, подви́жесѧ и҆ тре́петна бы́сть землѧ̀.
Моли́твами бцⷣы, сп҃се, спасѝ на́съ.
Та́же, в҃-й ли́къ, сті́хъ г҃-й.
Ѱало́мъ р҃г: Во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ, ѡ҆дѣѧ́йсѧ свѣ́томъ ꙗ҆́кѡ ри́зою.
Моли́твами бцⷣы, сп҃се, спасѝ на́съ.
Сла́ва, и҆ ны́нѣ:
Моли́твами бцⷣы, сп҃се, спасѝ на́съ.
А҆нтїфѡ́нъ в҃. Ѱало́мъ м҃з.
Сті́хъ а҃: Го́ры сїѡ́нскїѧ, ре́бра сѣ́верова, гра́дъ цр҃ѧ̀ вели́кагѡ.
Спаси́ ны, сн҃е бж҃їй, преѡбрази́выйсѧ на горѣ̀, пою́щыѧ тѝ: а҆ллилꙋ́їа.
Дрꙋгі́й ли́къ то́йже. Ѱало́мъ ѻ҃з.
Сті́хъ в҃: И҆ введѐ ѧ҆̀ въ го́рꙋ ст҃ы́ни своеѧ̀, го́рꙋ сїю̀, ю҆́же стѧжа̀ десни́ца є҆гѡ̀.
Спаси́ ны, сн҃е бж҃їй, преѡбрази́выйсѧ на горѣ̀:
Сті́хъ г҃: Го́рꙋ сїѡ́ню, ю҆́же возлюбѝ, и҆ созда̀ ꙗ҆́кѡ є҆диноро́га ст҃и́лище своѐ.
Спаси́ ны, сн҃е бж҃їй, преѡбрази́выйсѧ на горѣ̀:
Сла́ва, и҆ ны́нѣ:
Е҆диноро́дный сн҃е и҆ сло́ве:
А҆нтїфѡ́нъ г҃. Ѱало́мъ рк҃д: гла́съ з҃.
Сті́хъ а҃: Надѣ́ющїисѧ на гдⷭ҇а, ꙗ҆́кѡ гора̀ сїѡ́нъ, не подви́житсѧ во вѣ́къ.
Тропа́рь, гла́съ з҃:
Преѡбрази́лсѧ є҆сѝ на горѣ̀, хрⷭ҇тѐ бж҃е, показа́вый ᲂу҆ч҃никѡ́мъ твои̑мъ сла́вꙋ твою̀, ꙗ҆́коже можа́хꙋ: да возсїѧ́етъ и҆ на́мъ грѣ̑шнымъ свѣ́тъ тво́й присносꙋ́щный, моли́твами бцⷣы, свѣтода́вче, сла́ва тебѣ̀.
Сті́хъ в҃: Го́ры ѻ҆́крестъ є҆гѡ̀ и҆ гдⷭ҇ь ѻ҆́крестъ люде́й свои́хъ ѿ ны́нѣ и҆ до вѣ́ка.
Тропа́рь: Преѡбрази́лсѧ є҆сѝ на горѣ̀:
Ѱало́мъ д҃і.
Сті́хъ г҃: Гдⷭ҇и, кто̀ ѡ҆бита́етъ въ жили́щи твое́мъ; и҆лѝ кто̀ всели́тсѧ во ст҃ꙋ́ю го́рꙋ твою̀;
Тропа́рь: Преѡбрази́лсѧ є҆сѝ на горѣ̀:
Ѱало́мъ к҃г.
Сті́хъ д҃: Кто̀ взы́детъ на го́рꙋ гдⷭ҇ню; и҆лѝ кто̀ ста́нетъ на мѣ́стѣ ст҃ѣ́мъ є҆гѡ̀;
Тропа́рь: Преѡбрази́лсѧ є҆сѝ на горѣ̀:
Вхо́дное: Гдⷭ҇и, послѝ свѣ́тъ тво́й, и҆ и҆́стинꙋ твою̀, та́ мѧ наста́виста, и҆ введо́ста мѧ̀ въ го́рꙋ ст҃ꙋ́ю твою̀.
Тропа́рь: Преѡбрази́лсѧ є҆сѝ на горѣ̀:
Сла́ва, и҆ ны́нѣ, конда́къ, гла́съ то́йже:
На горѣ̀ преѡбрази́лсѧ є҆сѝ, и҆ ꙗ҆́коже вмѣща́хꙋ ᲂу҆ченицы̀ твоѝ, сла́вꙋ твою̀, хрⷭ҇тѐ бж҃е, ви́дѣша: да є҆гда́ тѧ ᲂу҆́зрѧтъ распина́ема, страда́нїе ᲂу҆́бѡ ᲂу҆разꙋмѣ́ютъ во́льное, мі́рови же проповѣ́дѧтъ, ꙗ҆́кѡ ты̀ є҆сѝ вои́стиннꙋ ѻ҆́ч҃ее сїѧ́нїе.
Трист҃о́е. Прокі́менъ, гла́съ д҃:
Ꙗ҆́кѡ возвели́чишасѧ дѣла̀ твоѧ̑, гдⷭ҇и, всѧ̑ премꙋ́дростїю сотвори́лъ є҆сѝ.
Сті́хъ: Благословѝ, дꙋшѐ моѧ̀, гдⷭ҇а, гдⷭ҇и бж҃е мо́й возвели́чилсѧ є҆сѝ ѕѣлѡ̀.
А҆пⷭ҇лъ, петро́ва посла́нїѧ, зача́ло ѯ҃є.
А҆ллилꙋ́їа, гла́съ и҃: Твоѧ̑ сꙋ́ть нб҃са̀, и҆ твоѧ̀ є҆́сть землѧ̀.
Сті́хъ: Блаже́ни лю́дїе вѣ́дꙋщїи воскликнове́нїе.
Е҆ѵⷢ҇лїе матѳе́а, зача́ло ѻ҃.
За Досто́йно, і҆рмо́съ:
Ржⷭ҇тво̀ твоѐ нетлѣ́нно ꙗ҆ви́сѧ:
И҆ до ѿда́нїѧ.
Прича́стенъ: Гдⷭ҇и, во свѣ́тѣ лица̀ твоегѡ̀ по́йдемъ, и҆ ѡ҆ и҆́мени твое́мъ возра́дꙋемсѧ во вѣ́ки.
На трапе́зѣ же разрѣша́емъ на ры́бꙋ, и҆ є҆ле́й, и҆ вїно̀, а҆́ще среда̀ и҆лѝ пѧто́къ.
Подоба́етъ вѣ́дати: Ꙗ҆́кѡ преда́нїе и҆́мамы ѿ ст҃ы́хъ ѻ҆тє́цъ, ѿ сп҃си́тельнагѡ сегѡ̀ пра́здника преѡбраже́нїѧ снѣда́ти гро́здїе, и҆дѣ́же ѡ҆брѣта́етсѧ, благослове́нїе прїе́мше ѿ і҆ере́а, принесе́нꙋ бы́вшꙋ гро́здїю въ це́рковь, и҆ по а҆нафѡ́рѣ раздробле́нꙋ.
Глаго́летсѧ же сїѧ̀ моли́тва на благослове́нїе гро́здїѧ, ѿ ст҃и́телѧ и҆лѝ ѿ і҆ере́а:
Бж҃е сп҃си́телю на́шъ, благоволи́вый вїногра́дъ нарещѝ є҆диноро́днаго твоего̀ сн҃а, гдⷭ҇а бг҃а и҆ сп҃са на́шего і҆и҃са хрⷭ҇та̀, и҆ тѣ́мъ пло́дъ безсме́ртїѧ на́мъ дарова̀: са́мъ и҆ ны́нѣ пло́дный се́й вїногра́дъ благословѝ, и҆ на́съ рабы̑ твоѧ̑ вкꙋша́ющыѧ ѿ негѡ̀, и҆́стиннагѡ вїногра́да прича́стники сотворѝ. Неврежде́ннꙋ жи́знь на́шꙋ сохранѝ, и҆ ми́ръ на́мъ всегда̀ да́рꙋй. И҆ вѣ́чными твои́ми неѿе́млемыми дарова̑нїи жи́знь на́шꙋ ᲂу҆красѝ, моли́твами пречⷭ҇тыѧ влⷣчцы на́шеѧ бцⷣы и҆ приснодв҃ы марі́и, и҆ всѣ́хъ твои́хъ ст҃ы́хъ ѿ вѣ́ка тебѣ̀ бл҃гоꙋгоди́вшихъ: ꙗ҆́кѡ бл҃гъ и҆ чл҃колю́бецъ бг҃ъ є҆сѝ, и҆ тебѣ̀ сла́вꙋ возсыла́емъ безнача́льномꙋ ѻ҆ц҃ꙋ̀, со є҆диноро́днымъ твои́мъ сн҃омъ, и҆ съ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Внима́й: Ꙗ҆́кѡ а҆́ще кто̀ ѿ бра́тїи снѣ́сть гро́здїе пре́жде сицева́гѡ пра́здника: то̀ преслꙋша́нїѧ запреще́нїе да прїи́метъ, и҆ да не вкꙋ́ситъ гро́здїе чрезъ ве́сь а҆́ѵгꙋстъ мѣ́сѧцъ, ꙗ҆́кѡ заповѣ́данный ᲂу҆ста́въ презрѣ́въ: ꙗ҆́кѡ да ѿ сегѡ̀ навы́кнꙋтъ и҆ про́чїи повинова́тисѧ ᲂу҆ста́вꙋ ст҃ы́хъ ѻ҆тє́цъ.
Сїе́ же запреще́нїе да быва́етъ и҆ блюдꙋ́щымъ вїногра́ды бра́тїи. Гро́здїю же на трапе́зѣ по пра́здницѣ се́мъ три́жды въ недѣ́лю подоба́етъ предлага́тисѧ бра́тїи: си́рѣчь въ понедѣ́льникъ, въ сре́дꙋ, въ пѧто́къ, да вкꙋша́ютъ бра́тїѧ.
Се́й ᲂу҆ста́въ быва́етъ и҆ на смо́квахъ, и҆ надъ про́чими ѻ҆вощьмѝ: ꙗ҆́вѣ, ꙗ҆́кѡ времена̀ и҆́хъ ко́е когда̀ приспѣ́етъ.
Сїѧ̑ же глаго́лемъ кромѣ̀ приноси́мыхъ блюдꙋ́щымъ смѡ́кви и҆ раздає́мымъ: снѣда́ютъ бо сїѧ̑.
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Небе́сных чино́в:
И́же с Моисе́ом глаго́лавый дре́вле/ на горе́ Сина́йстей о́бразы, глаго́ля:/ Аз е́смь Сый;/ дне́сь же на горе́ Фаво́рстей преобрази́ся,/ началообра́зное показу́я, луча́ми облиста́яся./ Те́мже, Христе́, велича́ю Твою́ си́лу. (Два́жды.)
Пое́мь осо́бь Твоя́, Христе́, ученики́,/ Петра́, Иа́кова и Иоа́нна,/ во́лею на го́ру сих возве́л еси́,/ чу́до стра́шное показа́в/ и нестерпи́мое Боже́ственнаго прише́ствия Твоего́ издале́ча/ присносу́щное благоле́пие.
Твоего́, Христе́, прише́ствия непостижи́маго/ тре́петни бы́вше апо́столи дре́вле,/ ниц на зе́млю па́дше,/ Боже́ственней Твое́й дивля́хуся си́ле:/ со́лнца просия́в светле́е, Бла́же,/ неизрече́нною си́лою твое́ю.
Сла́ва, и ны́не, глас 8:
Мрак зако́нный/ све́тлый преображе́ния прия́т о́блак,/ в не́мже Моисе́й и Илия́ бы́вше/ и пресве́тлыя сла́вы сподо́бльшеся, Бо́гу глаго́лаху:/ Ты еси́ наш, Царь веко́в.
На стихо́вне стихи́ры, глас 2.
Подо́бен: До́ме Евфра́фов:
Дне́сь Христо́с/ на горе́ Фаво́рстей,/ Ада́мово премени́в/ очерне́вшее естество́,/ просвети́в, богосоде́ла.
Стих: Твоя́ су́ть небеса́,/ и Твоя́ е́сть земля́.
Сия́нием доброде́телей/ просве́щшеся, вопие́м,/ на горе́ святе́й/ зря́ще Боже́ственное/ Госпо́дне Преображе́ние.
Стих: Фаво́р и Ермо́н/ о И́мени твое́м возра́дуетася.
Со́лнце у́бо,/ зе́млю уясня́я,/ а́бие захо́дит,/ Христо́с же, со сла́вою облиста́в на горе́,/ мир просвети́л е́сть.
Сла́ва, и ны́не, глас и подо́бен то́йже:
Ви́деша на Фаво́ре/ Моисе́й же и Илия́/ от Де́вы Отрокови́цы/ Бо́га воплоща́ема,/ челове́ком на избавле́ние.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Стихоло́гия не быва́ет, то́кмо а́ще е́сть Неде́ля, тогда́ пое́м кафи́зму всю; а́ще в понеде́льник, пе́рвый антифо́н. На Го́споди, воззва́х: стихи́ры на 8, самогла́сны, глас 4, по два́жды. Космы́ мона́ха:
Пре́жде Креста́ Твоего́, Го́споди,/ гора́ Небеси́ подо́бящися,/ и о́блак, я́ко се́нь, протяза́шеся,/ Тебе́ преобразу́ющуся,/ от Отца́ же свиде́тельствуему:/ та́мо бе Петр со Иа́ковом и Иоа́нном,/ я́ко хотя́ху бы́ти с Тобо́ю и во вре́мя преда́ния Твоего́,/ да, ви́девше чудеса́ Твоя́,/ не устраша́тся страда́ний Твои́х,/ и́мже поклони́тися нам в ми́ре сподо́би,/ вели́кия ра́ди Твое́й ми́лости.
Пре́жде Креста́ Твоего́, Го́споди,/ пои́м ученики́ на го́ру высо́ку,/ преобрази́лся еси́ пред ни́ми,/ луче́ю си́лы озаря́я их,/ отсю́ду у́бо человеколю́бием,/ отону́ду вла́стию,/ показа́ти хотя́ воскресе́ния све́тлость,/ его́же и нас, Бо́же, в ми́ре сподо́би,/ я́ко Ми́лостив и Человеколю́бец.
Гора́, я́же, иногда́ мра́чна и ды́мна,/ ны́не же честна́ и свя́та е́сть,/ на не́йже но́зе Твои́ стоя́сте, Го́споди,/ преве́чное бо сокрове́нное та́инство/ напосле́док явле́но сотвори́,/ стра́шное Твое́ преображе́ние,/ Петру́, и Иоа́нну, и Иа́кову./ и́же, такова́ сия́ния лица́ Твоего́ не терпя́ще/ и све́тлости риз Твои́х,/ ниц на лице́ земли́ покрыва́хуся,/ и́же и у́жасом одержи́ми, дивля́хуся,/ ви́дяще Моисе́я и Илию́, глаго́люща с Тобо́ю,/ хотя́щая приключи́тся тебе́;/ и глас от Отца́ свиде́тельствоваше, глаго́ля:/ Сей е́сть Сын Мой возлю́бленный,/ о Не́мже благоизво́лих,/ того́ послу́шайте,/ и́же и да́рует ми́рови ве́лию ми́лость.
На горе́ высо́це преображе́н, Спас,/ верхо́вныя име́я ученики́,/ пресла́вно облиста́л е́сть,/ показу́я, я́ко высото́ю доброде́телей облиста́вше/ и Боже́ственней сла́ве сподо́бятся./ Глаго́лющии со Христо́м Моисе́й и Илия́ пока́зоваху,/ я́ко живы́ми и ме́ртвыми облада́ет/ и и́же дре́вле зако́ном и проро́ки глаго́лавый е́сть Бог,/ Ему́же и глас Оте́чь из о́блака све́тла послу́шествоваше, глаго́лющий:/ того́ послу́шайте,/ и́же Кресто́м а́да плени́вша/ и ме́ртвым да́рующа живо́т ве́чный.
Сла́ва, и ны́не, глас 6. Анато́лия:
Прообразу́я воскресе́ние твое́, Христе́ Бо́же,/ тогда́ поя́т три Твоя́ ученики́,/ Петра́, и Иа́кова, и Иоа́нна,/ на Фаво́р возше́л еси́./ Тебе́ же, Спа́се, преобразу́ющуся,/ Фаво́рская гора́ Све́том покры́вшиеся,/ ученицы́ Твои́, Сло́ве,/ поверго́ша себе́ до́лу на земли́,/ не терпя́ще зре́ти неви́димаго зра́ка,/ А́нгели служа́ху стра́хом и тре́петом,/ небеса́ убоя́шася,/ земля́ вострепета́,/ ви́дяще на земли́ сла́вы Го́спода.
Вход. Проки́мен дне. И чте́ния.
Исхо́да чте́ние (глава́ 24):
Рече́ Госпо́дь к Моисе́ю:/ взы́ди ко Мне на го́ру и ста́ни та́мо,/ и дам ти скрижа́ли ка́менныя, зако́н и за́поведи, я́же написа́х взако́нити им./ И воста́в Моисе́й и Иису́с, предстоя́й ему́, взыдо́ша на го́ру Бо́жию./ И ста́рцем рече́:/ безмо́лвствуйте та́мо, до́ндеже возврати́мся к вам,/ и се Ааро́н и Ор с ва́ми,/ а́ще кому́ прилучи́тся суд, да и́дут к ним./ И взы́де Моисе́й на го́ру, и покры́ о́блак го́ру./ И сни́де сла́ва Бо́жия на го́ру Сина́йскую,/ и покры́ ю о́блак ше́сть дней,/ и призва́ Госпо́дь Моисе́я в де́нь седмы́й из среды́ о́блака./ Виде́ние же сла́вы Госпо́дни,/ я́ко о́гнь, паля́ на версе́ горы́,/ пря́мо сыно́в Изра́илевых./ И вни́де Моисе́й посреде́ о́блака, и взы́де на го́ру,/ и бе та́мо, на горе́, четы́редесять дней/ и четы́редесять ноще́й.
Исхо́да чте́ние (главы́ 33–34):
Во днех о́нех, глаго́ла Госпо́дь к Моисе́ю лице́м к лицу́,/ я́ко а́ще бы кто возглаго́лал к своему́ дру́гу, и отсыла́шеся в полк;/ слуга́ же Иису́с, сын Нави́н, ю́ноша не исхожда́ше из ски́нии./ И рече́ Моисе́й ко Го́споду:/ се Ты мне глаго́леши, изведи́ лю́ди сия́,/ Ты же не яви́л ми еси́, его́же по́слеши со мно́ю./ Ты же мне рекл еси́:/ вем тя па́че всех, и благода́ть и́маши у Мене́./ А́ще у́бо обрето́х благода́ть пред Тобо́ю,/ яви́ ми Сама́го Тебе́ разу́мно, да ви́жу Тя:/ я́ко да обре́т бу́ду благода́ть пред Тобо́ю,/ и да разуме́ют, я́ко лю́дие Твоя́ язы́к сей./ И глаго́ла ему́ Госпо́дь:/ Аз Сам предыду́ пред тобо́ю и упоко́ю тя./ И рече́ к Нему́ Моисе́й:/ а́ще Сам Ты не ше́ствуеши с на́ми,/ да не изведе́ши мя отсю́ду./ И ка́ко ве́домо бу́дет вои́стинну, я́ко обрето́х благода́ть у тебе́,/ аз же и лю́дие Твои́, то́чию иду́щу Ти с на́ми?/ И просла́влен бу́ду аз же и лю́дие Твоя́/ па́че всех язы́к, ели́цы су́ть на земли́./ Рече́ же Госпо́дь к Моисе́ю:/ сие́ сло́во твое́, е́же рекл еси́, сотворю́,/ обре́л бо еси́ благода́ть пре́до Мно́ю, и вем тя па́че всех./ И глаго́ла Моисе́й: покажи́ ми сла́ву Твою́./ И рече́: Аз предыду́ пред тобо́ю сла́вою Мое́ю/ и воззову́ о и́мени Мое́м, Госпо́дь пред тобо́ю./ И поми́лую, его́же а́ще ми́лую,/ и уще́дрю, его́же а́ще ще́дрю./ И рече́: не возмо́жеши ви́дети лице́ Мое́:/ не бо у́зрит челове́к лице́ Мое́, и жив бу́дет./ И рече́ Госпо́дь:/ се ме́сто у Мене́, и ста́неши на ка́мени,/ до́ндеже у́бо пре́йдет сла́ва моя́, и положу́ тя в разсе́лине ка́мене,/ и покры́то руко́ю Мое́ю над тобо́ю, до́ндеже мимоиду́./ И отыму́ ру́ку Мою́, и тогда́ у́зриши за́дняя моя́,/ лице́ же Мое́ не яви́т ти ся./ И у́треневав, Моисе́й зау́тра взы́де на го́ру Сина́йскую,/ я́коже глаго́ла ему́ Госпо́дь./ И сни́де Госпо́дь во о́блаце,/ и предста́ Ему́ та́мо Моисе́й, и призва́ и́менем Госпо́дним./ И мимои́де Госпо́дь пред лице́м его́, и призва́:/ Госпо́дь Щедр и Ми́лостив,/ Долготерпели́в, и Многоми́лостив, и И́стинен./ И потща́вся Моисе́й, прини́к на зе́млю,/ поклони́ся Го́сподеви.
Царств тре́тиих чте́ние (глава́ 19):
Во днех о́нех, прии́де Илия́ в Вирсави́ю,/ я́же е́сть земля́ Иу́дова,/ и оста́ви о́трочища своего́ та́мо./ И сам по́йде в пусты́ню пу́ть дне,/ и прии́де, и се́де под сме́рчием, и у́спе,/ и сон ви́де та́мо, под са́дом./ И се не́кий прикосну́ся ему́,/ и рече́ ему́: воста́ни, я́ждь и пий./ И воззре́ Илия́,/ и се при возгла́вии его́ опресно́к ячме́нный и корча́г во́ды;/ и воста́, и яде́, и пит, и, обра́щся, у́спе./ И обра́щся А́нгел Госпо́день втори́цею,/ и косну́ся его́, и рече́ ему́:/ воста́ни, я́ждь и пий, я́ко мног от Тебе́ пу́ть./ И воста́, и яде́, и пит,/ и и́де в кре́пости я́ди тоя́ четы́редесять дней/ и четы́редесять ноще́й до го́ры Хори́вския./ И вни́де та́мо в пеще́ру, и всели́ся в ней./ И се глаго́л Госпо́день к нему́, и рече́ ему́ Госпо́дь:/ изы́ди и ста́ни на горе́ пред Го́сподем./ И се Госпо́дь мимои́дет, и дух ве́лий и кре́пок разоря́я го́ры,/ и сокруша́я ка́мение пред Го́сподем:/ не в ду́се Госпо́дь./ И по ду́се трус, и не в тру́се Госпо́дь./ И по тру́се о́гнь, и не во огни́ Госпо́дь./ И по огни́ глас хла́да то́нка, и та́мо Госпо́дь./ И бы́сть, я́ко услы́ша Илия́, покры́ лице́ свое́ ми́лотию свое́ю,/ и изы́де, и ста близ пеще́ры./ И рече́ Госпо́дь к нему́:/ иди́ и возврати́ся в пу́ть твой,/ и по́йдеши в пу́ть пусты́ни Дама́сковы,/ и пома́жеши Елиссе́я, сы́на Асафа́това, вме́сто Тебе́ проро́ка.
На лити́и стихи́ры самогла́сны, глас 2:
И́же Све́том Твои́м всю вселе́нную освяти́в,/ на горе́ высо́це преобрази́лся еси́, Бла́же,/ показа́в ученико́м Твои́м си́лу Твою́,/ я́ко мир избавля́еши от преступле́ния./ Те́мже вопие́м Ти:/ Милосе́рде Го́споди, спаси́ души́ на́ша.
И́же на горе́ Фаво́рстей преобра́жся во сла́ве, Христе́ Бо́же,/ и показа́в ученико́м Твои́м сла́ву Твоего́ Божества́,/ озари́ и нас све́том Твоего́ разуме́ния/ и наста́ви на стезю́ за́поведей Твои́х,/ я́ко еди́н Благ и Человеколю́бец.
И́же пре́жде со́лнца Свет Христо́с/ теле́сне на земли́ жи́тельствуя/ и пре́жде Креста́ вся, я́же стра́шнаго смотре́ния, соверши́в боголе́пно,/ дне́сь на Фаво́рстей горе́,/ та́йно Тро́ицы о́браз показу́я,/ изя́щныя три ученики́,/ Петра́, и Иа́кова, и Иоа́нна, на ню возве́л еси́ наедине́/ и, ма́ло скрыв пло́ти восприя́тие,/ преобрази́лся еси́ пред ни́ми,/ явля́я началообра́зныя добро́ты благоле́пие/ и то не всесоверше́нно:/ о́во известву́я ты́я, вку́пе и щадя́,/ да не ка́ко со зра́ком и е́же жи́ти погубя́т,/ но я́ко можа́ху вмеща́ти, теле́сныма очи́ма стерпя́ще./ И проро́ков верхо́вныя, Моисе́я и Илию́, приве́л еси́,/ непрекосло́вне свиде́тельствующий его́ Божество́/ и я́ко Той е́сть и́стинное Оте́ческаго Существа́ сия́ние,/ госпо́дствуяй живы́ми и ме́ртвыми./ Тем и о́блак, я́коже се́нь, объя́т их,/ и глас свы́ше Оте́чь/ из о́блака шу́мно предсвиде́тельствующь и глаго́лющ:/ Сей е́сть, Его́же нетле́нно из чре́ва пре́жде денни́цы роди́х,/ Сын возлю́бленный Мой,/ Его́же посла́х спасти́/ во Отца́ и Сы́на и Ду́ха Свята́го креща́емыя/ и испове́дающия ве́рно,/ я́ко неразде́льна е́сть еди́на держа́ва Божества́,/ того́ послу́шайте./ Сам у́бо, Человеколю́бче Христе́ Бо́же,/ и нас озари́ Све́том непристу́пныя Твоея́ сла́вы/ и досто́йны покажи́ насле́дники/ безконе́чнаго Ца́рствия Твоего́, я́ко Пребла́г.
Сла́ва, глас 5:
Прииди́те, взы́дем на го́ру Госпо́дню/ и в дом Бо́га на́шего/ и у́зрим сла́ву преображе́ния его́,/ сла́ву я́ко Единоро́днаго от Отца́,/ све́том прии́мем Свет/ и, возвы́шени бы́вше ду́хом,/ Тро́ицу Единосу́щную воспои́м во ве́ки.
И ны́не, глас то́йже:
Зако́на и проро́ков/ Тя, Христе́, Творца́ и Испо́лнителя свиде́тельствоваша,/ зря́ще во о́блаце,/ Моисе́й Богови́дец и Илия́ огнеколесни́чник/ и неопа́льный небоше́ственник/ в преображе́нии Твое́м./ С ни́миже и нас Твоего́ просвеще́ния сподо́би, Влады́ко,/ пе́ти Тя во ве́ки.
На стихо́вне стихи́ры самогла́сны, глас 1:
И́же дре́вле с Моисе́ом глаго́лавый на горе́ Сина́йстей о́бразы,/ Аз е́смь, глаго́ля, Сый,/ дне́сь на горе́ Фаво́рстей преобра́жся пред ученики́,/ показа́ началообра́зую добро́ту зра́ка,/ в себе́ восприи́м челове́ческое существо́,/ и таковы́я благода́ти свиде́тели поста́вль – Моисе́я и Илию́,/ о́бщники творя́ше весе́лия,/ провозвеща́ющия сла́вное Креста́ ра́ди/ и спаси́тельное воскресе́ние.
Стих: Твоя́ су́ть небеса́,/ и Твоя́ е́сть земля́.
Твоего́ Единоро́днаго Сы́на прови́дев Ду́хом/ плотско́е к челове́ком прише́ствие,/ Богооте́ц Дави́д издале́ча к весе́лию созыва́ет тва́рь/ и проро́чески взыва́ет:/ Фаво́р и Ермо́н о И́мени Твое́м возра́дуются./ На сию́ бо возше́д го́ру, Спа́се, со ученики́ Твои́ми,/ очерне́вшее Ада́мово естество́,/ преобра́жся, облиста́ти па́ки сотвори́л еси́,/ претвори́в е в Твоего́ Божества́ сла́ву же и све́тлость./ Те́мже вопие́м Ти:/ Соде́телю вся́ческих, Го́споди, сла́ва Тебе́./
Стих: Фаво́р и Ермо́н/ о И́мени твое́м возра́дуетася.
Неодержи́мое Твоего́ светоли́тия,/ и непристу́пное Божества́,/ зря́ще апо́столов лу́чшим,/ на горе́ преображе́ния, Безнача́льне Христе́,/ Боже́ственным измени́шася у́жасом/ и, о́блаком осия́вшеся све́тлым,/ глас слы́шаху Оте́чь, известву́ющь та́инство Твоего́ вочелове́чения,/ я́ко еди́н еси́ и по воплоще́нии,/ Сын Единоро́дный/ и Спас ми́ра.
Сла́ва, и ны́не, глас 6:
Петру́, и Иа́кову, и Иоа́нну,/ лу́чшим ученико́м Твои́м, Го́споди,/ дне́сь показа́л еси́ на горе́ Фаво́рстей/ сла́ву Боже́ственнаго Твоего́ зра́ка:/ ви́дяху бо ри́зы Твоя́, облиста́вшия, я́ко свет,/ и лице́ твое́ па́че со́лнца,/ не терпя́ще зре́ти нестерпи́мое Твоего́ сия́ния,/ на зе́млю низпа́даху,/ ника́коже зре́ти могу́ще./ Глас же слы́шаху, свиде́тельствующь свы́ше:/ Сей е́сть Сын Мой возлю́бленный,/ прише́дый в мир спасти́ челове́ка.
На благослове́нии хле́бов тропа́рь, глас 7:
Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́. (Три́жды.)
И чте́ние пра́здника.
НА У́ТРЕНИ
На Бог Госпо́дь: тропа́рь пра́здника, три́жды.
По 1-й стихоло́гии седа́лен, глас 4.
Подо́бен: Удиви́ся Ио́сиф:
Челове́ческое измене́ние, е́же со сла́вою твое́ю, Спа́се,/ второ́е и стра́шное Твоего́ прише́ствия показу́я,/ на горе́ Фаво́рстей преобрази́лся еси́./ Илия́ и Моисе́й глаго́лаху с Тобо́ю,/ и трие́х от учени́к спризва́в,/ и́же, ви́девше, Влады́ко, сла́ву Твою́, блиста́нию Твоему́ удиви́шася./ и́же тогда́ сим Свет Твой возсия́вый, просвети́ души́ на́ша.
Сла́ва, и ны́не, то́йже.
По 2-й стихоло́гии седа́лен, глас и подо́бен то́йже:
На горе́ Фаво́рстей преобрази́лся еси́, Иису́се,/ и о́блак све́тел, протяза́ющся, я́ко сень, апо́столы сла́вою покры́,/ Те́мже и на зе́млю ниц па́даху,/ не терпя́ще зре́ти све́тлости непристу́пныя сла́вы лица́ Твоего́,/ Безнача́льне Спа́се, Христе́ Бо́же./ и́же тогда́ сим Свет Твой возсия́вый, просвети́ ду́ши на́ша.
Сла́ва, и ны́не, то́йже.
По полиеле́и седа́лен, глас то́йже.
Подо́бен: Вознесы́йся:
Возше́д со ученики́ на го́ру и во сла́ве О́тчи облиста́в,/ с Моисе́ом Илия́ Тебе́ предстоя́т,/ зако́н и проро́цы бо я́ко Бо́гу слу́жат./ Ему́же и сыновство́ есте́ственное Роди́тель испове́дая, нарица́ше Сы́на,/ Его́же воспева́ем с Тобо́ю и Ду́хом.
Сла́ва, и ны́не, глас 8.
Подо́бен: Повеле́нное:
Сокрове́нную мо́лнию под пло́тию существа́ Твоего́, Христе́,/ и Боже́ственнаго благоле́пия на святе́й показа́л еси́ горе́, Благоде́телю,/ просия́в су́щим с Тобо́ю ученико́м,/ и, разуме́вше нестерпи́му су́щу сла́ву Твою́, – Свят еси́, – возопи́ша,/ я́ко, непристу́пен сый, ви́ден был еси́ пло́тию ми́рови,/ Еди́не Человеколю́бче.
Степе́нна, 1-й антифо́н 4-го гла́са. Проки́мен, глас 4: Фаво́р и Ермо́н/ о И́мени твое́м возра́дуетася. Стих: Твоя́ су́ть небеса́,/ и Твоя́ е́сть земля́. Ева́нгелие от Луки́, зача́ло 45.
По 50-м псалме́
Сла́ва: Вся́ческая дне́сь ра́дости испо́лнишася:/ Христо́с преобрази́ся пред ученики́.
И ны́не, то́йже.
Стихи́ра самогла́сна, глас 5:
Божества́ Твоего́, Спа́се, ма́лу зарю́ обнажи́в/ совозше́дшим с Тобо́ю на го́ру,/ преми́рныя Твоея́ сла́вы сотвори́л еси́ рачи́тели./ Те́мже ужа́сно зовя́ху:/ добро́ е́сть нам зде бы́ти./ С ни́миже и мы Тебе́, преобра́жшагося Спа́са Христа́,/ пое́м во ве́ки.
Кано́на два: кир Космы́, глас 4, и кир Иоа́нна, глас 8, ирмосы́ обою́ кано́нов по два́жды, тропари́ вси пое́м на 12.
Кано́н, глас 4.
Пе́снь 1
Ирмо́с: Ли́цы изра́ильтестии,/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты враги́ ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.
Глаго́лы живо́тныя друго́м Христо́с/ и о Боже́ственнем наказу́я Ца́рствии, рече́:/ во Мне Отца́ позна́йте;/ Све́том я́ко облиста́я непристу́пным, в ра́дости пою́ще:/ пои́м Бо́гу на́шему, я́ко просла́вися.
Си́лою язы́к облече́теся, дру́зи ученицы́,/ чу́дни же бу́дете в бога́тстве их, я́ко сла́вы напо́лнитеся,/ я́ко явлю́ся светле́е со́лнца, облиста́я в ра́дости пою́щих:/ пои́м Бо́гу на́шему, я́ко просла́вися.
Дне́сь Христо́с, на горе́ Фаво́рстей просия́в я́сно Боже́ственною заре́ю,/ я́коже обеща́ся, ученико́м обнажи́ зрак,/ светоно́сныя же напо́лнившеся Боже́ственныя зари́, в ра́дости поя́ху:/ пои́м Бо́гу на́шему, я́ко просла́вися.
Други́й кано́н, глас 8.
Пе́снь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Моисе́й, на мо́ри проро́чески ви́дев/ о́блаком и столпо́м дре́вле о́гненным сла́ву Госпо́дню, вопия́ше:/ Изба́вителю и Бо́гу на́шему пои́м.
Я́ко ка́менем, те́лом покры́вся,/ обоже́нием Неви́димаго зря, Моисе́й Богови́дец взыва́ше:/ Изба́вителю и Бо́гу на́шему пои́м.
Ты на горе́ зако́нней и на Фаво́рстей/ ви́ден был еси́ Моисе́ем во мра́це дре́вле,/ во Све́те же ны́не непристу́пнем Божества́.
Катава́сия: Крест начерта́в, Моисе́й:
Пе́снь 3
Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.
Во всего́ Ада́ма обле́кся, Христе́,/ очерне́вшее, измени́в, просвети́л еси́ дре́вле естество́/ и измене́нием зра́ка Твоего́ богосоде́лал еси́.
Столпо́м огнезра́чным и о́блаком дре́вле/ и́же в пусты́ни Изра́иля ве́дый,/ дне́сь на горе́ Фаво́рстей неизрече́нно во све́те Христо́с просия́.
Ин
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Осеня́ющая сла́ва в се́ни пе́рвее и Моисе́еви бесе́дующи, Твоему́ уго́днику,/ о́браз бы́сть облиста́вшаго неизрече́нно/ на Фаво́ре, Влады́ко, Твоего́ преображе́ния.
Совзыдо́ша Ти, Сло́ве Единоро́дный,/ вы́шнии апо́стольстии вереи́ на го́ру Фаво́рскую,/ и сопредста́ша Ти Моисе́й же и Илия́, я́ко Бо́жия слуги́, Еди́не Человеколю́бче.
Бог Сло́во сый, ве́сь зе́млен бы́сть,/ всему́ Божеству́ смеси́в челове́чество во ипоста́си Свое́й,/ ю́же во двою́ существу́ Моисе́й и Илия́ же ви́деша на горе́ Фаво́ре.
Седа́лен, глас 4.
Подо́бен: Удиви́ся Ио́сиф:
На горе́ Фаво́рстей преобрази́лся еси́, Иису́се,/ посреде́ Илии́ и Моисе́я прему́дрых, со Иа́ковом, и Петро́м, и Иоа́нном./ Петр же, сопребыва́я, сия́ Тебе́ глаго́лаше:/ добро́ зде е́сть сотвори́ти три се́ни:/ еди́ну Моисе́ю, и еди́ну Илии́, и еди́ну Тебе́, Влады́це Христу́./ и́же тогда́ Свет Твой сим возсия́вый, просвети́ души́ на́ша.
Сла́ва, и ны́не, то́йже.
Пе́снь 4
Ирмо́с: Услы́шах сла́вное смотре́ние твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди.
Зако́н в Сина́и писа́нием вообража́я, Христе́ Бо́же,/ во о́блаце, и огни́, и мра́це, и в ви́хре яви́лся еси́ носи́м:/ сла́ва си́ле Твое́й, Го́споди.
Да уве́риши сла́вное строе́ние твое́, Христе́ Бо́же,/ я́ко Сый пре́жде век и То́йже на о́блаце восхожде́ние положи́вый,/ на Фаво́ре неизрече́нно просия́л еси́.
Соглаго́люще, предстоя́ху раболе́пно Тебе́, Влады́це Христу́,/ к ни́мже па́рою огня́ и мра́ка и то́нким хла́дом бесе́довал еси́:/ сла́ва си́ле Твое́й, Го́споди.
Возвеща́ху сла́вное Креста́ ра́ди Твоего́, на Фаво́р прише́дше,/ и́же во огни́ Тя и купине́ дре́вле предви́девый Моисе́й/ и взя́тый на колесни́це о́гненней Илия́, Христе́.
Ин
Ирмо́с: Из пло́ти Твоея́ лучи́ Божества́/ исхожда́ху проро́ком и апо́столом./ Тем нача́льницы, пою́ще, взыва́ху:/ сла́ва си́ле Твое́й, Го́споди.
И́же купину́ сохрани́вый неврежде́ну, прикосну́вшуюся огню́,/ Моисе́ю богосия́нную пло́ть показа́л еси́, Влады́ко, пою́щему:/ сла́ва си́ле Твое́й, Го́споди.
Скры́ся заре́ю Божества́ чу́вственное со́лнце,/ я́ко на горе́ Фаво́ре ви́дев Тя преобразу́ющася, Иису́се мой:/ сла́ва си́ле Твое́й, Го́споди.
О́гнь, не опаля́я ве́щи теле́сныя, ви́ден бы́сть невеще́ствен,/ я́коже Моисе́ю и апо́столом яви́лся еси́, Илии́ же, Влады́ко,/ еди́н от двою́, во дву соверше́нну естеству́.
Пе́снь 5
Ирмо́с: От све́та пресеки́й перворо́дный свет,/ я́ко во све́те дела́ пою́т Тя, Христе́, Соде́теля,/ во све́те твое́м пути́ на́ша напра́ви.
Пред лице́м Твои́м го́ры уклони́шася,/ свет бо и пред нога́ми неботе́чныя лучи́, Христе́, со́лнца прии́де,/ зрак зе́млен я́ко прия́ти благоволи́л еси́.
Се Спас, –/ вопия́ху Моисе́й и Илия́ ученико́м,/ на горе́ святе́й Фаво́рстей оглаша́емым, –/ Христо́с, Его́же дре́вле провозвести́хом Су́щаго Бо́га.
Неизме́нное естество́, челове́ческому примеси́ся,/ оби́льно невеще́ственнаго Божества́ Свет/ изобнажи́в апо́столом, неизрече́нно возсия́.
Тя, присносу́щное сия́ние, во Оте́честей сла́ве/ ученицы́ я́ко ви́девше возсия́вша, Христе́, Тебе́ вопия́ху:/ во све́те твое́м пути́ на́ша напра́ви.
Ин
Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Вети́йствующий язы́к Твоего́ вели́чества не мо́жет веща́ти:/ я́ко бо, Держа́й живо́т и сме́ртию Влады́й,/ предста́вил еси́ на Фаво́рстей горе́ Моисе́я и Илию́,/ свиде́тельствующий твое́ Божество́.
И́же рука́ми неви́димыми созда́в по о́бразу Твоему́, Христе́, челове́ка,/ началообра́зную Твою́ в созда́нии добро́ту показа́л еси́,/ не я́ко во о́бразе, но я́ко Сам Сый по существу́,/ был еси́ и Челове́к.
Сраствори́вся неслия́нно, у́гль горя́щ показа́л еси́ нам Божества́,/ попаля́ющ у́бо грехи́, души́ же просвеща́ющ, на Фаво́рстей горе́,/ Моисе́я со Илие́ю, ученико́в же старе́йшин удиви́л еси́.
Пе́снь 6
Ирмо́с: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́.
Сия́ния па́че со́лнца Свет ясне́йший, Спас, просия́в на Фаво́ре,/ нас просвети́л е́сть.
Возше́д на го́ру Фаво́рскую, преобрази́лся еси́, Христе́,/ и, ле́сть всю омрачи́в, нас просвети́л еси́.
Тя Бо́га позна́вше сла́внии апо́столи,/ на Фаво́ре же, Христе́, уди́вильшеся, коле́на преклони́ша.
Ин
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же спасе́ния моего́.
Я́ко ве́лие и стра́шное узре́ся виде́ние дне́сь:/ с небесе́ у́бо чу́вственное, от земли́ же несравне́нное/ облиста́ Со́лнце пра́вды мы́сленное на горе́ Фаво́рстей.
Преи́де у́бо се́нь зако́нная, изнемо́гшая,/ прии́де же я́ве Христо́с и́стина, – Моисе́й возопи́,/ на Фаво́ре ви́дев твое́ Божество́.
Столп о́гненный – Христа́ преобразу́ющася,/ о́блак же – я́ве благода́ть Ду́ха, осени́вшую на Фаво́ре,/ предсказа́ша явле́ннейше.
Конда́к, глас 7. Самогла́сен:
На горе́ преобрази́лся еси́,/ и я́коже вмеща́ху ученицы́ Твоя́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.
И́кос:
Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние.
Пе́снь 7
Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.
Облиста́вшеся Све́том непристу́пныя сла́вы на Фаво́рстей горе́,/ апо́столи Христу́ вопия́ху:/ оте́ц на́ших Бо́же, благослове́н еси́.
Сия́нием Боже́ственнаго шу́ма, и росода́тельным о́блаком, Христе́,/ и заре́ю Твое́ю наслажда́еми, апо́столи поя́ху:/ оте́ц на́ших Бо́же, благослове́н еси́.
В непристу́пном Све́те, я́ко ви́де Тя Петр,/ на Фаво́рстей горе́ облиста́вша, Христе́, возопи́:/ оте́ц на́ших Бо́же, благослове́н еси́.
С Нача́льником жи́зни Христо́м су́ще, де́ти Зеведе́евы,/ я́ко испусти́ зра́ка Свет, возгреме́ша:/ оте́ц на́ших Бо́же, благослове́н еси́.
Ин
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.
Ны́не ви́дена бы́ша апо́столом неви́димая Божества́ во пло́ти,/ на горе́ Фаво́рстей облиста́вша, вопию́щим:/ благослове́н еси́, Го́споди Бо́же, во ве́ки.
Ужасо́шася стра́хом, уди́вльшиеся благоле́пию Боже́ственнаго Ца́рства,/ на горе́ Фаво́рстей апо́столи, вопию́ще:/ благослове́н еси́, Го́споди Бо́же, во ве́ки.
Ны́не неуслы́шанная услы́шана бы́ша:/ без отца́ бо Сын от Де́вы Оте́ческим гла́сом сла́вно свиде́тельствуется,/ я́ко и Челове́к То́йже во ве́ки.
Положе́нием не был еси́ Вы́шняго, существо́м же Сын возлю́блен,/ пре́жде Сый, нам прибли́жился еси́ непрело́жно:/ благослове́н еси́, Го́споди Бо́же, во ве́ки.
Пе́снь 8
Ирмо́с: В Вавило́не о́троцы,/ Боже́ственною распала́еми ре́вностию,/ мучи́теля и пла́мене преще́ние му́жески попра́ша/ и, посреде́ огня́ вве́ржени, ороша́еми, поя́ху:/ благослови́те, вся дела́ Госпо́дня, Го́спода.
Манове́нием вся нося́й, нога́ми пречи́стыми на го́ру взы́де Фаво́рскую Христо́с,/ на не́йже па́че со́лнечныя лучи́ облиста́ лице́м,/ и́же зако́ну старе́йшия и благода́ти показа́ пою́щия:/ благослови́те, вся дела́ Госпо́дня, Го́спода.
Непристу́пною сла́вою на горе́ я́влься неизрече́нно Фаво́рстей,/ неодержи́мый и незаходи́мый Свет, О́тчее сия́ние,/ тва́рь уясни́в, челове́ки обожи́, пою́щия:/ благослови́те, вся дела́ Госпо́дня, Го́спода.
Священноле́пно стоя́ще Моисе́й же и Илия́ на горе́ Фаво́ре,/ Боже́ственныя начерта́ние я́сно ипоста́си ви́девше,/ Христа́, во Оте́честей облиста́вша сла́ве, воспева́ху:/ благослови́те, вся дела́ Госпо́дня, Го́спода.
И́же во зра́це Боже́ственнаго ра́ди явле́ния лице́ просла́вися иногда́ Моисе́ово,/ Христо́с же, я́ко ри́зою, Све́том и сла́вою одева́ется,/ Све́та бо самоде́телен Сый, озаря́ет пою́щия:/ благослови́те, вся дела́ Госпо́дня, Го́спода.
От светоро́дна о́блака Христа́ ученицы́ объя́та зря́ще на Фаво́ре/ и ни́цы на зе́млю па́дше, ум просве́щше,/ со Отце́м сего́ поя́ху и Ду́хом:/ благослови́те, вся дела́ Госпо́дня, Го́спода.
Ин
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Услы́шавше, Влады́ко, от Отца́ свиде́тельствуема,/ и я́ко челове́ческа тверде́йша зра́ка зре́ти лица́ Твоего́ блиста́ния не терпя́ще,/ Твоя́ ученицы́ на зе́млю ниц па́даху, со стра́хом пою́ще:/ свяще́нницы, благослови́те, лю́дие, превозноси́те во вся ве́ки.
Ца́рствующим еси́ Ца́рь прекра́сен и и́же всю́ду владя́щим Госпо́дь си́лен,/ Блаже́н и во све́те живы́й непристу́пней,/ Ему́же ученицы́ уди́вльшеся, Моисе́й же и Илия́ вопия́ху:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Я́ко Не́бом владу́щему, и земле́ю госпо́дствующему,/ и над преиспо́дними о́бласть иму́щему, Христе́, предста́ша Ти:/ от земли́ у́бо – апо́столи, я́ко с Небесе́ же – Фесви́тянин Илия́,/ Моисе́й же – от ме́ртвых, пою́ще согла́сно:/ лю́дие, превозноси́те во вся ве́ки.
Уны́ние ражда́ющия печа́ли на земли́ оста́виша апо́столов избра́ннии, Человеколю́бче,/ я́ко Тебе́ после́доваша, ко и́же от земли́ преложе́нию Боже́ственнаго жития́./ Те́мже и, по достоя́нию Твоего́ Богоявле́ния улучи́вше, поя́ху:/ лю́дие, превозноси́те его́ во ве́ки.
На 9-й пе́сни Честне́йшую: не пое́м, а́ще и в Неде́лю, но пое́м припе́в пра́здника:
Велича́й, душе́ моя́,/ на Фаво́ре преобрази́вшагося Го́спода.
Та́же Ирмо́с: Рождество́ твое́: Посе́м вторы́й лик пое́т то́йже припе́в и Ирмо́с. И ко второ́му кано́ну припева́ют то́йже припе́в.
Пе́снь 9
Ирмо́с: Рождество́ твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.
Ужа́сни но́вым светоли́тием внеза́пу ученицы́ осве́щшеся, друг дру́га зря́ху,/ уди́вльшеся же и к земли́ прекло́ньшеся,/ Тебе́, Влады́це всех, поклони́шася.
Шум из о́блака посыла́шеся богогла́сен, известву́я чу́до:/ Оте́ц бо Све́тов, – Сей е́сть Сын Мой возлю́бленный, – апо́столом вопия́ше:/ того́ послу́шайте.
Но́вая ви́девше и пресла́вная, глас Оте́ческий внуши́вше,/ на Фаво́ре Словесе́ слуги́, изображе́ние Первообра́знаго,/ Сей е́сть, – вопия́ху, – Спас наш.
О́бразе непреме́нный Су́щаго, недви́жиме, печа́ть неизме́нна,/ Сы́не, Сло́ве, му́дросте и мы́шце, десни́це Вы́шняго, Си́ло,/ Тя воспева́ем со Отце́м же и Ду́хом.
Ин
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Да твое́ пока́жеши я́ве неизрече́нное второ́е сни́тие,/ я́ко да Вы́шний яви́шися,/ стоя́ посреде́ бого́в, апо́стол на Фаво́ре,/ Моисе́я же и Илию́, неизрече́нно осия́л еси́./ Те́мже вси Тя, Христе́, велича́ем.
Прииди́те, Мне покори́теся, лю́дие, возше́дше на го́ру святу́ю пренебе́сную,/ невеще́ственно ста́нем во гра́де Жива́го Бо́га/ и у́зрим мы́сленно Божество́ невеще́ственное,/ Отца́ и Ду́ха, в Сы́не Единоро́днем облиста́ющее.
Привле́кл еси́ любо́вию мя, Спа́се,/ и премени́л еси́ Боже́ственным Твои́м жела́нием,/ но попали́ огне́м невеще́ственным грехи́ моя́/ и насы́титися Твое́й пи́щи сподо́би,/ да, обое́ игра́я, велича́ю, Бла́же, вели́чия Твоя́.
Свети́лен:
Све́те неизме́нный, Сло́ве, Све́та Отца́ нерожде́нна, в явле́ннем све́те твое́м,/ дне́сь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тва́рь. (Три́жды.)
На хвали́тех, Вся́кое дыха́ние: поста́вим стихи́ 4, глас 4.
Подо́бен: Зва́нный свы́ше:
Пре́жде Честна́го Креста́ Твоего́ и страда́ния,/ пои́мь, и́хже проразсуди́л еси́, от свяще́нных учени́к,/ на Фаво́рскую, Влады́ко, возше́л еси́ го́ру,/ показа́ти восхоте́в сим сла́ву Твою́:/ и́же и ви́девше Тя, преобрази́вшася/ и па́че со́лнца просия́вша,/ ни́цы па́дше,/ си́ле Твоея́ удиви́шася, взыва́юще:/ Ты безле́тен Свет еси́, Христе́,/ и сия́ние О́тчее,/ а́ще и во́лею пло́ть яви́лся еси́, Неизме́нне. (Два́жды.)
И́же пре́жде век Сый Сло́во,/ и́же Све́том, я́ко ри́зою, одева́яйся,/ преобразу́ющийся пред ученики́ Твои́ми,/ па́че со́лнца, Сло́ве, просия́л еси́,/ Моисе́й же и Илия́ Тебе́ предста́ша,/ ме́ртвым и живы́м Тя, Го́спода, пове́дающе/ и твое́ сла́вяще неизрече́нное смотре́ние, и ми́лость,/ и мно́гое милосе́рдие,/ и́мже спасл еси́ мир,/ грехо́м погиба́ющий.
От Деви́ческаго о́блака Тя рожде́нна,/ и пло́ть бы́вша,/ и на горе́ Фаво́рстей преобразу́ющася, Го́споди,/ и о́блаком све́тлым Тя окружа́ема,/ глас Роди́телев возлю́бленнаго Тя Сы́на,/ ученико́м предстоя́щим Тебе́, я́ве ска́зоваше,/ я́ко Единосу́щна и Единопресто́льна./ Те́мже Петр удивля́яся, –/ добро́ е́сть зде бы́ти, – глаго́лаше,/ не ве́дый, е́же глаго́лаше,/ Благоде́телю Многоми́лостиве.
Сла́ва, и ны́не, глас 8. Византи́ево:
Поя́т Христо́с Петра́, Иа́кова и Иоа́нна/ на го́ру высоку́ еди́ны/ и преобрази́ся пред ни́ми и просвети́ся лице́ его́, я́ко со́лнце,/ ри́зы же его́ бы́ша белы́, я́ко свет;/ и яви́шася Моисе́й и Илия́ с Ним, глаго́люще,/ и о́блак све́тел осени́ их./ И се глас из о́блака, глаго́лющ:/ Сей е́сть Сын Мой возлю́бленный,/ о Не́мже благоволи́х,/ того́ послу́шайте.
Славосло́вие вели́кое, и отпу́ст.
На Литурги́и антифо́н 1, глас 2.
Стих 1. Псало́м 65: Воскли́кните Го́сподеви, вся земля́,/ по́йте же И́мени его́, дади́те сла́ву хвале́ его́.
Моли́твами Богоро́дицы, Спа́се, спаси́ нас.
Па́ки други́й лик то́йже стих: Воскли́кните Го́сподеви: Моли́твами Богоро́дицы, Спа́се, спаси́ нас.
И па́ки 1-й лик, стих 2-й. Псало́м 76: Глас гро́ма Твоего́ в колеси́, освети́ша мо́лния Твоя́ вселе́нную,/ подви́жеся и тре́петна бы́сть земля́.
Моли́твами Богоро́дицы, Спа́се, спаси́ нас.
Та́же 2-й лик, стих 3-й. Псало́м 103: Во испове́дание и в велеле́поту обле́клся еси́,/ одея́йся све́том, я́ко ри́зою.
Моли́твами Богоро́дицы, Спа́се, спаси́ нас.
Сла́ва, и ны́не: Моли́твами Богоро́дицы, Спа́се, спаси́ нас.
Антифо́н 2.
Псало́м 47. Стих 1: Го́ры Сио́нския, ре́бра се́верова,/ град Царя́ Вели́каго.
Спаси́ ны, Сы́не Бо́жий,/ преобрази́выйся на горе́, пою́щия Ти:/ Аллилу́ия.
Други́й лик, то́йже: псало́м 77, стих 2: И введе́ я в го́ру святы́ни Свое́й,/ го́ру сию́, ю́же стяжа́ десни́ца его́.
Спаси́ ны, Сы́не Бо́жий, преобрази́выйся на горе́, пою́щия Ти:/ Аллилу́ия.
Стих 3: Го́ру Сио́ню, ю́же возлюби́,/ и созда́, я́ко единоро́га, святи́лище Свое́.
Спаси́ ны, Сы́не Бо́жий, преобрази́выйся на горе́, пою́щия Ти:/ Аллилу́ия.
Сла́ва, и ны́не: Единоро́дный Сы́не и Сло́ве Бо́жий:
Антифо́н 3. Псало́м 124, глас 7.
Стих 1: Наде́ющимся на Го́спода,/ я́ко гора́ Сио́н не подви́жится во век.
Тропа́рь, глас 7:
Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́.
Стих 2: Го́ры о́крест его́,/ и Госпо́дь о́крест люде́й Свои́х от ны́не и до ве́ка.
Тропа́рь: Преобрази́лся еси́:
Псало́м 14. Стих 3: Го́споди, кто обита́ет в жили́щи твое́м?/ Или́ кто всели́тся во святу́ю го́ру Твою́?
Тропа́рь: Преобрази́лся еси́:
Псало́м 23. Стих 4: Кто взы́дет на го́ру Госпо́дню?/ Или́ кто ста́нет на ме́сте святе́м его́?
Тропа́рь: Преобрази́лся еси́:
Вхо́дное: Го́споди, посли́ Свет Твой и и́стину Твою́,/ та мя наста́виста и введо́ста мя в го́ру святу́ю Твою́.
Тропа́рь: Преобрази́лся еси́:
Сла́ва, и ны́не, Конда́к, глас то́йже:
На горе́ преобрази́лся еси́,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.
Трисвято́е.
Проки́мен, глас 4: Я́ко возвели́чишася дела́ Твоя́, Го́споди,/ вся Прему́дростию сотвори́л еси́. Стих: Благослови́, душе́ моя́, Го́спода,/ Го́споди Бо́же мой, возвели́чился еси́ зело́. Апо́стол, Петро́ва посла́ния, зача́ло 65. Аллилу́ия, глас 8: Твоя́ су́ть небеса́,/ и Твоя́ е́сть земля́. Стих: Блаже́ни лю́дие, ве́дущии воскликнове́ние. Ева́нгелие от Матфе́я, зача́ло 70. За Досто́йно: Ирмо́с: Рождество́ твое́ нетле́нно яви́ся: и до отда́ния.
Прича́стен: Го́споди, во све́те Лица́ Твоего́ по́йдем/ и о И́мени твое́м возра́дуемся во ве́ки.
На трапе́зе же разреша́ем на ры́бу, и еле́й, и вино́, а́ще среда́ или́ пято́к.
Подоба́ет ве́дати: я́ко преда́ние и́мамы от святы́х оте́ц, от спаси́тельнаго сего́ пра́здника Преображе́ния снеда́ти гро́здие, иде́же обрета́ется, благослове́ние прие́мше от иере́я. Принесе́ну бы́вшу гро́здию в це́рковь и по анафо́ре раздробле́ну. Глаго́лется же сия́ моли́тва на благослове́ние гро́здия от святи́теля или́ от иере́я:
Бо́же, Спаси́телю наш,/ благоволи́вый виногра́д нарещи́ Единоро́днаго Твоего́ Сы́на,/ Го́спода Бо́га и Спа́са на́шего Иису́са Христа́,/ и Тем плод безсме́ртия нам дарова́,/ Сам и ны́не пло́дный сей виногра́д благослови́/ и нас, рабы́ Твоя́, вкуша́ющия от него́, И́стиннаго Виногра́да прича́стники сотвори́, неврежде́нну жи́знь на́шу сохрани́, и мир нам всегда́ да́руй,/ и ве́чными Твои́ми неотъе́млемыми дарова́нии жи́знь на́шу украси́,/ моли́твами Пречи́стыя Влады́чицы на́шея Богоро́дицы и Присноде́вы Мари́и/ и всех Твои́х святы́х, от ве́ка Тебе́ благоугоди́вших,/ я́ко Благ и Человеколю́бец еси́,/ и Тебе́ сла́ву возсыла́ем,/ Безнача́льному Отцу́, со Единоро́дным Твои́м Сыно́м/ и с Пресвяты́м, и Благи́м, и Животворя́щим Твои́м Ду́хом,/ ны́не, и при́сно, и во ве́ки веко́в. Ами́нь.
Моли́тва над вся́ким плодо́м
Го́споди, Бо́же наш, положи́вый ве́рующим в Тя по́льзование творе́нии Твои́ми, Сам благослови́ предлежа́щия плоды́ сия́ сло́вом Твои́м, мо́лмся Тебе́, ми́лостию и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в. Ами́нь.
Внима́й: я́ко а́ще кто от бра́тии снесть гро́здие пре́жде сицева́го пра́здника, то преслуша́ния запреще́ние да прии́мет и да не вку́сит гро́здие чрез ве́сь а́вгуст ме́сяц, я́ко запове́данный уста́в презре́в; я́ко да от сего́ навы́кнут и про́чии повинова́тися уста́ву святы́х оте́ц.
Сие́ же запреще́ние да быва́ет и блюду́щим виногра́ды бра́тии.
Гро́здию же на трапе́зе по пра́зднице сем три́жды в неде́лю подоба́ет предлага́тися бра́тии: си́речь в понеде́льник, в сре́ду, в пято́к, да вкуша́ют бра́тия.
Сей уста́в быва́ет и на смо́квах, и над про́чими овощми́, я́ве, я́ко времена́ их, ко́е когда́ приспе́ет.
Сия́ же глаго́лем, кроме́ приноси́мых блюду́щим смо́кви и раздае́мым: снеда́ют бо сия́.
Преображе́ние Госпо́дне. Все три синоптических Ева́нгелия содержа́т весьма́ сходные описа́ния Преображе́ния Госпо́дня (; ; ). Вско́ре по́сле того́, как Спаси́тель откры́л ученикам, что Ему́ надлежи́т мно́го пострадать от иуде́ев, быть убиту и в тре́тий день воскреснуть, Он возве́л трех апо́столов – Петра́, Иа́кова и Иоа́нна на го́ру Фаво́р и преобрази́лся пе́ред ни́ми: лицо его́ просияло, как со́лнце, оде́жды сделались белы́, как снег.
Преображе́ние Христо́во сопровождалось явле́нием ветхозаветных проро́ков Моисе́я и Илии́, кото́рые говорили с Го́сподом о его́ близком отше́ствии.
Изумление ученико́в дости́гло преде́ла, когда́ всех осенило све́тлое о́блако, и из него́ послышался глас: «Сей есть Сын Мой Возлю́бленный, о Не́мже благоволи́л; того́ послуша́йте».
Святооте́ческая мысль, углубляющаяся в свяще́нную та́йну Преображе́ния, ви́дит его́ с трех сторон. Во-пе́рвых, что есть Преображе́ние для Само́го Христа́, что нового раскрыл Он нам в себе́. Здесь са́мый сокрове́нный момент Преображе́ния, и потому́ святы́е отцы́ избега́ют простра́нно рассуждать о нем, что́бы земны́ми сло́вами не исказить несказанного. Во-вторы́х, рассматривается уча́стие в Преображе́нии святы́х проро́ков Моисе́я и Илии́ и апо́столов Петра́, Иа́кова и Иоа́нна; э́та сторона собы́тия́ освещается гораздо подробнее. В-третьих, Преображе́ние Христо́во есть неиссяка́емый исто́чник нравственного науче́ния и духо́вного назида́ния.
Празднованием Преображе́ния Го́спода испове́дует соедине́ние во Христе́ двух есте́ств – челове́ческого и Боже́ственного. Преображе́ние есть явле́ние Сы́на при свиде́тельстве Отца́ в Ду́хе Свято́м, то есть открове́ние всех Лиц Свято́й Тро́ицы. Для Спаси́теля Преображе́ние состояло не в измене́нии, не в каком-ли́бо возрастании его́ Боже́ственной приро́ды, обладавшей изначальной полнотой, но в явле́нии его́ Божества́ в природе челове́ческой.
У ученико́в, возведенных на Фаво́р, де́йствием Божества́ открылись духовные о́чи, благодаря́ чему́ они́ оказались способны созерцать Боже́ственный Свет. По мы́сли свято́го , Фаворский Свет – это «Сла́ва Бо́жия» и «Ца́рство Бо́жие», в нем апостолам была́ откры́та «та́йна восьмого дня», та́йна того́ светоносного «гра́да», Нового Иерусали́ма, о котором свиде́тельствует Апокалипсис. «Госпо́дь преобрази́лся не без причины, но дабы́ показать нам бу́дущее преображе́ние естества́ на́шего и бу́дущее Свое́ прише́ствие на облаках во сла́ве с а́нгелами», – говорит святи́тель Иоа́нн Златоу́ст.
Посвящения в та́йну бу́дущего ве́ка бы́ли удостоены лишь избра́нные из числа́ двена́дцати апо́столов, «столпы́» апостольского ли́ка (), кото́рые одни лишь бы́ли отмечены переменой и́мени, соверше́нной над ни́ми Христо́м. Э́ти избра́нники вме́сте с проро́ками Моисе́ем и Илией олицетворяли на Фаво́ре всю – в этом экклезиологический смысл Преображе́ния. В ева́нгельском повествовании Преображе́ние имело еще́ одно значение: оно́ до́лжно бы́ло при гряду́щем Голгофском уничиже́нии Христа́ укрепить апо́столов в их ве́ре, дать им незы́блемое свиде́тельство Божества́ Иису́са Христа́ и добровольности его́ Кре́стных страда́ний и сме́рти. Об этом пое́тся в кондаке Преображе́нию: «Да егда́ Тя у́зрят распина́ема, страда́ние уразуме́ют во́льное, ми́рови же пропове́дят, я́ко Ты еси́ вои́стинну О́тчее сия́ние».
Кроме́ того́ Преображе́ние име́ет отношение ли́чно к каждому христианину: мо́жем ли мы, име́я ту же челове́ческую природу, что и апо́столы, стать участниками Преображе́ния, прикоснуться к жи́зни бу́дущего ве́ка, воспринять Фаворский Свет? В этом стремле́нии к озарению нетва́рным Све́том и состоит духо́вный смысл на́шей жи́зни. О́браз этого стремле́ния показа́л Сам Госпо́дь на Фаво́ре в Свое́й моли́тве. По свиде́тельству святи́теля , име́я в себе́ от Себя́ Само́го нетварный Свет, Спаси́тель не нуждался в моли́тве для осия́ния Свое́й пло́ти, – моли́лся же Он, что́бы показать, что блиста́ние происхо́дит от моли́твы, от соедине́ния ума́ с Бого́м. Потому́ и христианину, жела́ющему удостоиться своего́ личного Фавора, надлежи́т постоянно упражняться в моли́тве и доброде́тели, отвращаясь от земны́х по́мыслов и устремля́я свой ум, свою́ любо́вь к Бо́гу. Ве́ра в то, что э́та цель достижима, что обоже́ние челове́ческой приро́ды возмо́жно – важнейший момент христиа́нского уче́ния о человеке.
Обоже́ние есть условие, предварение спасе́ния. И́менно поэтому Преображе́ние – зало́г Воскресе́ния.
Глубо́кий назидательный смысл Преображе́ния содержи́тся в отдельных его́ символах. Высота́ Горы́ означает по блаже́нному Феофилакту возвышенность ду́ха над земны́ми привязанностями, без чего́ созерца́ние небе́сного невозмо́жно. Сама́ Гора́ зна́менует необходимость двух по́двигов – богомы́слия и труда́, без чего́ невозмо́жно взойти на высоту́: богомы́слие возно́сит ум вверх, труд же способствует смире́нию. Гора́ указывает та́кже на уедине́ние и безмо́лвие, благоприятствующие моли́тве. Многозначительно и само́ избра́ние Христо́м места́, где свершилось Преображе́ние, так как Фаво́р по-евре́йски означает черто́г чистоты́ и све́та. Возводя́ ученико́в и́менно на Фаво́р, Госпо́дь жела́л, что́бы из само́го названия горы́ следовало, что для принятия Боже́ственного Све́та необходимо очище́ние покая́нием.
Впервые церко́вные исто́чники упоминают о пра́зднике Преображе́ния в нача́ле IV в. Древнейшим изображе́нием собы́тия́ явля́ется находящаяся в хра́ме во и́мя свято́го Аполлина́рия в Равенне (Италия) фреска VI ве́ка, кото́рая име́ет аллегорический смысл: лицо Спаси́теля заменено кресто́м в кругу со зве́здным фоном, апо́столы же показаны в ви́де а́гнцев. Святы́е проро́ки Моисе́й и Илия́ стоя́т по сторонам Креста́. На гре́ческих ико́нах наряду́ с сами́м Преображе́нием ча́сто изображались восхожде́ние на го́ру и схожде́ние с нее. На ру́сских ико́нах иногда́ имелись некоторые прибавления к кано́ну; так, например, показывалось, как оди́н а́нгел выводит из гро́ба Моисе́я, а друго́й сво́дит с облако́в Илию́. Изве́стна и «ночна́я » ико́на Преображе́ния: на о́бразе XVI ве́ка устюжского письма фоном для свяще́нного собы́тия́ явля́ется ночное зве́здное не́бо. Полага́ют, что здесь не одно соблюде́ние пра́вды исторического факта, но и осо́бый смысл: на ночном фоне мо́лния Преображе́ния зна́менует нача́ло нового дня творе́ния – бу́дущего ве́ка.
Литература:
1. О вели́ких Госпо́дских и Богоро́дичных праздниках. Ки́ев, 1835.
2. Церко́вная на двунадеся́тые пра́здники. Ч. I. Сост. П. Смирнов. Ки́ев, 1904.
3. Творе́ния и́же во святы́х отца́ на́шего , архиепи́скопа Константинопольского. Т. 6. Пг., 1915.
4. Трубецкой Е. Два ми́ра в древне-ру́сской иконописи. М., 1916.